Bacalao finnast i mange variantar, men er i hovudsak ein gryterett med klippfisk, poteter, lauk, tomatpuré, paprika, olivenolje og spansk pepar.
Originalt kjem retten frå Portugal og tradisjonen fortel at det var fiskeoppkjøparar frå Baskerland i Spania som tok med seg retten til Kristiansund på 1800 -talet. Interessa for den salta og tørka klippfisken oppstod i mellomalderen. Paven og hans kardinalar påla truande katolikkar å ete fisk i staden for kjøt. Spesielt gjaldt dette på langfredag, men også på påskeaftan, fordi det blei sett på som lite fromt å meiske seg i kjøt under Jesu liding. Bacalao er derfor ein ekte påskerett.
Påska er høgtid og mange er enten på hytta eller heime og har vennelag eller familiefest. Når ein lagar mat til mange er denne oppskrifta ein garantert suksess. Den beste stemninga på kjøkenet får ein når ein lagar mat saman, enten som par, med vener eller at born og ungdom er med. Når matlaginga vert fordelt på alle som skal ete, kan ein få gode samtalar og betre vennskap på kjøpet. Her kjem mi beste oppskrift på Bacalao, ha ei god påske!
Ingrediensar til 6–8 porsjonar
1 kg klippfisk
12–14 poteter
4 store løk
2 paprika
2 fedd kvitlauk
6 ss olivenolje
2 boksar hermetiske
tomatar (a 400 g)
1 boks tomatpuré (130 g)
3–4 dl vatn
1/4 ts. svart pepar
1/2 ts. spanskpepar eller
kajennepepar
Hakka persille
Framgangsmåte
Legg klippfisken i vatn i ca. 1 døgn, bytt vatn av og til. Fjern skinn og bein. Dette går lett om fisken får eit lite oppkok først. Skjer fisken i passe serveringstykker. Skrell potetene, reinsk lauken og paprikaen. Skjer potetene i ca. 1 cm tjukke skiver, lauken i ringar og paprikaen i strimlar. Finhakk kvitlauken. Slå oljen i ein stor tjukkbotna kjele og legg lagvis fisken, potetene, lauken, paprikaen, kvitlauken og kryddera. Legg i tomatane med krafta, rør tomatpuréen ut i vatnet og slå over. Gi bacalaoen eit oppkok og la den stå å trekke rett under kokepunktet under lok i ca. ein time. Rist på kjelen av og til, men ikkje rør i den. Smak bacalaoen til. Dryss hakka persille over og server saman med flatbrød eller loff.
Kari Ryslett - Høgskulelektor i Matkultur og helse ved Høgskulen i Volda
Kari’s Matblogg.blogspot.com
