Grilla biffspyd med satay-saus

Grilla biffspyd med satay-saus er smakfull og lettvint mat som passar godt no som vi er lei av mektig julemat med ”milde” smakar. Satay-sausen er laga på knasande peanøttsmør og kokosmjølk og er perfekt for deg som er glad i nøtter og asiatiske smakar. Retten har sitt opphav i Indonesia og er populær gatemat mange stadar i Asia.

Biffspyda kan du grille på grillen ute eller i steikeomnen med grillfunksjon. Husk då berre på å legge grillpinnane i blaut i vatn i god tid før grilling, eller eventuelt bruk grillspyd i metall. Om du vil gjere det enda enklare kan du også steike kjøtet på høg varme i steikepanna.

Ingrediensar for ca. 4 personar:

Biff & marinade:

• 500-600 g ytrefilet av storfe

• 2 ts Sriracha (sterk chilisaus)

• 4 ss soyasaus

• 2 ss rapsolje

• 2 ss brun farin

• 1 fedd kvitløk, knust

• 1 vårløk, finhakka

• 1 lime, safta

• 1 neve fersk koriander, finhakka

Satay-saus:

• 2 ss kokosolje

• ½ løk, finhakka

• ½ rød chili, finhakka

• 1 fedd kvitløk, knust

• 150 g peanøttsmør, “crunchy” type

• 1 ts akasiehonning

• 2 dl kokosmjølk

• 1-2 ts fiskesaus

• 1-2 ss soyasaus

• 1 neve salte peanøtter

Tilbehør:

• ris/grilla pitabrød

• agurk

• vårløk

• lime

• salte peanøtter

Skjær kjøtet i strimlar på ca. 1- 1 ½ cm breidde. Ha alle ingrediensane til marinaden i ein bolle og bland godt. Ha i kjøtet og lat det marinere i nokre timar i romtemperatur eller i kjøleskap over natta.

Tre kjøtbitane på grillspyd og grill dei på grillen ute nokre minutt på kvar side til dei har fått fine grillmerke og er gjennomsteikte. Pensle restar av marinaden over det ferdig steikte kjøtet for ekstra smak. Eventuelt kan du sette steikeomnen på ca. 250 ºC og grillfunksjon. Legg grillspyda på ei rist med aluminiumsfolie med eit steikebrett under og set dei høgt oppe i omnen. Grill dei i ca. 5-8 minutt (alt etter varmen på omnen din). Brukar du grillpinnar av tre bør du passe godt på så dei ikkje byrjar å brenne.

Medan kjøtet steiker kan du lage klar satay-sausen. Varm opp kokosoljen i ei steikepanne og lat løk, kvitløk og chili surre i varmen til den blir mjuk. Ha i peanøttsmør og honning og rør godt rundt til alt er varmt. Ha over i ein stavmiksar. Tilsett kokosmjølka og kjør blandinga til ein puré. Smak til med fiskesaus og soyasaus. Hakk salte peanøtterog ha i om du ønskjer litt ekstra “crunch”.

Server varme grillspyd saman med agurk og vårløk, salte peanøtter, ris/brød og ein god skvett med limesaft over.

Marie-Lene Korsnes, Matbloggar og student i matkultur og helse ved Høgskulen i Volda.