Pizzabollane er supre å fryse ned og ta opp etter behov. Fyllet kan du variere etter eige ønske. Her har eg toppa fyllet med god spekepølse, som blir sprø og gir ein nydeleg aroma under steiking. Pizzabollane er steikt på steikebrett som er smurt inn med olivenolje. Dette gjer at du får ein sprø og knas-ande botn som er luftig, også inni.
Ingrediensar til 16–18 stk. pizzabollar:
Pizzadeig:
• 5 dl lunka vatn
• 2 dl lunka lettmjølk
• 25 g ferskgjær
• 3 ss olivenolje
• ca. 800–900 g kveitemjøl
• 200 g fullkornsmjøl
• 1 ts. salt
Fyll:
• 400 g kjøtdeig
• 2 fedd kvitløk, knust
• 3 store sjalottløk, finhakka
• 1 ss tørka oregano
• 1 ss tørka basilikum
• 2 ss tomatpuré
• 1 dl kyllingkraft
• 500 g hermetisert tomat
• 1 ts. sukker
• fersk timian
• salt & pepar
Topping:
• Tind spekepølse med sydlandske urter
• fersk timian
• riven ost (gjerne blanding av parmesan, kvitost, gouda etc.)
Ha vatn og mjølk i ein bakebolle og rør ut gjæra. Tilset olivenolje, mesteparten av kveitemjølet, fullkornsmjøl og salt og elt deigen godt i kjøkenmaskin i ca. 10 minutt. Juster med meir kveitemjøl til du får ei glatt og smidig deig som slepper bakebollen. La heve til dobbel storleik.
Varm opp ei steikepanne med litt olivenolje. Steik kjøtdeigen på høg varme til den blir godt bruna og får steikeskorpe. Skru ned varmen og ha i kvitløk og sjalottløk og la det surre til løken blir mjuk. Ha i oregano, basilikum og tomatpuré og la det surre med i eit par minutt. Deretter har du i kyllingkraft, tomat og sukker. Rør godt rundt og la det stå og småputre i ca. 10 minutt. Ha i timian og smak til med salt og pepar.
Del deigen i ca. 16–18 emne og form til runde bollar som du trykker flate. Smør to steikebrett med eit tynt lag olivenolje og sett bollane utover med litt avstand mellom kvar. Etterhev under kjøkenhandklede i ca. 45 minutt.
Forvarm steikeomnen til 230 grader. Lag ei lita fordjuping i kvar pizzabolle og fordel ca. 2 ss med fyll utover kvar av dei. Legg på eit par skiver spekepølse, fersk timian og topp deretter med ein raus porsjon riven ost. Steik midt i omnen i ca. 15–20 minutt. Pizzabollane er ferdige når dei har fått ein gyllen farge, er sprø på utsida og osten er godt smelta.
