Det er framleis sesong for vinterfiske av skrei langs kysten vår og det betyr at det også er sesong for torsketunger.
Torskehovuda er ein viktig ressurs og tungeskjerarane trer hovuda på ein pigg (sprikar) og skjer tunga og den kjøtfulle hakemuskelen av med ein sylskarp kniv.
Tungeskjering har lange tradisjonar og reknast som ein del av vår lokale kulturarv. Arbeidet er svært populært blant skuleungdom og barn heilt ned i 5 -årsalder er med på arbeidet. Dette er lovleg arbeid fordi det reknast som kulturelt barnearbeid. Mange barn og ungdom tener gode pengar i sesongen og meir om dette fenomenet kan du sjå i filmen «Tungeskjærerne». Dokumentaren skildrar eit spennande stykke av norsk fiskekultur. Torsketungene veg ca. 30–40 gram og sjølve tunga er geléaktig, medan hakemuskelen ligg under og utgjer den største delen som er fastare. Sprøsteikte torsketunger høyrer med til norsk tradisjonsmat og bør nytast i skreisesongen. Til denne oppskrifta servere du heimelaga, smakfull tartarsaus til dei sprøsteikte torsketungene og gjerne mandelpotet til.
Oppskrift:
Ingrediensar til 4 porsjonar
300 g torsketunge
1 stk. egg
¼ ts. salt
1 dl griljermjøl
1 dl olje
kajennepepar
salt
Tartarsaus
2 stk. egg
2 ss persille, frisk
2 ss sylteagurk
1 ss kapers
1 ss lauk
100 g majones
2 ss lake frå sylteagurk
sukker
salt og kvit pepar
Tilbehøyr
sitron
Framgangsmåte
• Skyl torsketungene og tørk dei med tørkepapir.
• Skil egg og pisk eggekvitene og salt til mjukt skum.
• Bland griljermjøl med salt og kajennepepar i ein tallerken.
• Vend torsketungene først i eggekvite, deretter i griljermjøl.
• Varm margarin/olje i steikepanna til den har god varme, og steik torsketungene til dei er gyllenbrune og gjennomsteikte.
Tartarsaus
• Kok egg hardkokt, avkjøl og grovhakk.
• Finhakk persille, sylteagurk, kapers og lauk, og bland dette saman med egg.
• Tilsett majones og rør inn litt lake frå sylteagurk til du får ein tjukk, men smidig saus.
• Smak til med litt sukker, salt og kvit pepar.
Server torsketungene saman med tartarsaus, mandelpotet og pynt med sitronbåtar, kapers og persille.
Kari Ryslett
Høgskulelektor i Matkultur og helse ved Høgskulen i Volda
