Ein av landets fremste bassistar gjestar Ulsteinvik

Fredag kveld er det tid for ein ny Club Sjøborg-kveld. Denne gongen er det ein jazzmusikar, kontrabassisten Steinar Raknes, som underheld, med vår lokale songfugl Torill Vågen Vattøy som gjestesolist.

Steinar Raknes er opphaveleg frå Misund i Romsdal. Han byrja å spele kontrabass i femtenårsalderen ved musikkskulen i Kristiansund. Seinare gjekk han mellom anna jazzlinja ved NTNU, der han var med å etablere jazzbandet the Core og trioen Urban Connection.

Steinar Raknes er rekna som ein av norges fremste bassistar og har turnert og gjort innspelingar med ei lang rekke norske og internasjonale musikarar. Han har samarbeidd med m.a. Ola Kvernbergs trio, han har vore medlem av Trondheim Jazz Orchestra og han leier sitt eige band "Tangos, Ballads and More". Steinar Raknes har fått svært gode kritikkar for sitt siste meir bluesprega album, Down South".