Torsdag 18. februar får Ulstein kunstlag og Ulstein kyrkje besøk av Christian Stejskal og multimediaframsyninga hans om dei kristne søppelarbeidarane i Kairo.

Førestillinga «Mitt nabolag» handlar om Stejskal si pilgrimsferd til fots frå Wien, via Jerusalem og til Axum i Nord-Etiopia. Undervegs på denne reisa møtte han zabaleenarane, Kairo sine uoffisielle kristne søppelarbeidarar, i det såkalla «Garbage City» i Kairo. Etter å ha avslutta pilgrimsferda til Axum flytta han inn til og levde saman med zabaleenarane i søppelbyen, samstundes som han jobba som fiolinist ved operaen i Kairo. Dei siste fem åra har han fotografert livet blant søppelarbeidarane og skrive noveller frå livet der.

Zabaleenarane

Dei kristne søppelarbeidarane utgjer til saman rundt 100.000 menneske spreidd utover sju ulike område i Kairo, men meir enn halvparten av dei bur ved Mokattfjellet, også kalla «Garbage City». Zabaleenarane var opphavleg fattige bønder i føydalske bondesamfunn frå ulike landsbyar i Sør-Egypt, og dei har emigrert til Kairo periodevis sidan 1940-talet. På reisa til den egyptiske hovudstaden har dei teke med seg sin særeigne kultur, religion, sine grisar og dialekta si.

Zabaleenarane var i søkelyset i internasjonale media i 2009 ved utbrotet av den internasjonale svineinfluensaen, då dei egyptiske styresmaktene storma områda deira og slakta alle dei 300.000 grisane som innbyggarane eigde, rettare sagt heile deira livsgrunnlag. Dette vart møtt av sterk internasjonal kritikk då Verdas helseorganisasjon erklærde at det ikkje var noko smittefare for menneske frå svin.

Foto, forteljing og fiolin

Under multimediaframsyninga vil Christian introdusere oss for sju forteljingar som omhandlar sju menneskeskjebnar frå søppelbyen: deira gleder og personlege utfordringar, tragediar og livets små triumfar. Samstundes vil han vise fotografi på storskjerm og spele arabisk musikk og koptiske songar på fiolin.

Christian Stejskal vart fødd i Wien i 1977. Han er utdanna fiolinist ved Norges musikkhøyskole, musikkhøgskulen i Hannover i Tyskland og musikkhøgskulen i Bern, Sveits. Han har jobba som fiolinist i dei fleste symfoniorkester i Noreg, mellom anna Den norske opera, Trondheim symfoniorkester og Stavanger symfoniorkester.

Christian er sjølvlærd fotograf, og prosjektet om zabaleenarane er hans hittil største fotoprosjekt. I 2012 stilte han med 25 bilete i finalen i Anthropographia International Photo Awards i New York. Arbeidet med prosjektet «Mitt nabolag» er gjort med støtte frå «Fritt ord» og «Stiftelsen Thomas Fearnley, Heddy og Nils Astrup», og vil bli gitt ut i bokform i 2016.

Ulstein kunstlag ønsker velkomen til ei interessant, sterk og vakker oppleving i Ulstein kyrkje.