Tradisjonell gresk moussaka er som lasagane er for italienarane. Eg har ete mykje moussaka i mitt liv, men ingen slår dei ekte greske du får i Hellas. I barndommen blei moussaka forbunde med ein slags lasagne-liknande grateng der pastaen var bytta ut med poteter. Her får du den autentiske varianten med både kanel og aubergine som gir den karakteristiske smaken.

Dersom du framleis ikkje er overtydd kan du bytte ut aubergine med poteter i tynne skiver og heller sløyfe kanelen. Server med gresk salat og brød og nyt.

Ingrediensar for ca. 6 personar:

• 2 middels store aubergine

• 600 g kjøtdeig av lam/storfe

• 1 stor gul løk

• 3 fedd kvitløk

• 400 g hermetisert tomat (av god kvalitet for få rund og søt smak)

• 2 ss tomatpuré

• 2 dl kjøtkraft

• ¾ dl raudvin

• 1 toppa ts kanel

• 2 ss tørka oregano

• nokre stilkar fersk persille, finhakka

• olivenolje

• salt & peppar

Bechamel-saus:

• 3 ss smør

• 4 ss kveitemjøl

• 5 dl heilmjølk

• ¼ ts muskatnøtt, malt

• 2 egg

• salt & pepar

• ca. 150 g kvitost, riven

Forvarm steikeomnen til 200 ºC. Skjær aubergine i ca. 1 cm tjukke skiver og legg utover på steikebrett. Strø på litt salt og lat ligge i 30 minutt slik at vatnet trekker ut. Dette er viktig for å unngå blaut og vassen grateng. Tørk av all væska. Ringle over litt olivenolje på toppen og steik i omnen i ca. 20-30 minutt, til dei er gyldne på farge og har krympa saman. Avkjøl litt. Skru omnen opp til 225 ºC.

Lag kjøtsausen ved å varme opp litt olivenolje i ei steikepanne. Finhakk løk og kvitløk og ha det i panna. Lat surre på middels varme til løken er mjuk og blank. Ha i kjøtdeiga, skru opp varmen og lat steike til kjøtet er bruna på alle sider. Tilsett tomatpuré, hermetiserte tomatar, kjøtkraft, raudvin, kanel og oregano. Lat småputre til væska har kokt inn ein del. Ha i fersk persille og smak til med salt og pepar.

For å lage bechamel-sausen smeltar du smøret i ein kjele og tilset kveitemjølet under kraftig pisking. Spe på med mjølka litt og litt i gongen medan du rører godt i botnen på kjelen. Lat sausen tjukne under stadig røring. Når den når kokepunktet og er blitt tjukk og god kan du trekke frå varmen og ha i muskatnøtt. Avkjøl i 5 minutt før du tilset egga eitt om gongen under pisking. Smak til med salt og pepar. Legg dei ferdig steikte aubergineskivene i botnen på ei eldfast form slik dei overlappar kvarandre. Fordel kjøtsausen utover i eit jamt lag og topp med bechamel-sausen. Strø over riven ost og set midt i omnen. Lat steike i ca. 30-35 minutt, til osten er gylden og sausen har stivna.

Mari-Lene Korsnes, matbloggar og student i matkultur og helse ved Høgskulen i Volda.

OM SPALTISTEN: Mari-Lene Korsnes og er for tida student i Matkultur og helse ved Høgskulen i Volda, jobbar som butikkmedarbeider og driv i tillegg matbloggen www.medhjerteformat.com. Foto: Marius Myklebust