I standarden for skrei står det: «Skrei er gytemoden norsk arktisk torsk (Gadus morhua), ikke foret, villfanget, i perioden 1. januar til 30. april i de naturlige gyteområdene for skrei.»

Produktet er ein del av vår norske identitet. TNS gallup på vegne av Norges sjømatråd viste at 98 % av alle nordmenn har høyrt om skrei, over 70 % av befolkninga meiner at skrei er eit norsk produkt på sitt beste og veit at skrei er sesongvare. Undersøkinga viser at forbrukarane assosierer skrei med Lofoten, fiske, ein vandrar, tørrfisk, Barentshavet, tradisjon, torsk, lever og rogn. Skreien har altså ei unik historie og kjem vandrande frå Barentshavet, noko som skil den frå torsk.

Som forbrukarar må vi vere tilfredse når vi et skrei og det kan bety å få ei god oppskrift med ein ny vri. Skreisesongen nærmar seg slutten og den nye vrien er skrei med smaksrik appelsinsaus, spinat og parmaskinke, dette løftar retten til eit nytt nivå. Nådelaust godt!

Ingrediensar til 4 porsjonar

800 g skreifilet med skinn

2 ½ ss salt

2 fedd kvitlauk

2 ss olivenolje

2 kvistar frisk timian

1 ss smør

6 skiver parmaskinke

Potetmos

600 g potet

100 g smør

2 dl heilmjølk

salt og pepar

Appelsinsaus

3 stk appelsin

1 stk raud chili

1 ½  dl crème fraîche

50 g smør

Tilbehør

200 g spinat

smør

salt og pepar

FRAMGANGSMÅTE

Sett steikeomnen på 230 °C. Skrap skreiskinnet godt, dryss salt over fisken og la den ligge i 10 minutt. Skyl av saltet og tørk godt med tørkepapir, og skjer fileten i porsjonsstykke. Knus kvitlauksfedd lett med flatsida av ein kjøkenkniv. Varm olivenolje i ei steikepanna, ha i kvitlauk og timian, og steik skreien med skinnsida ned til skinnet er sprøtt, ca. 4 minutt. Snu skreien, tilsett smør og trekk steikepanna av varmen. La skreien trekke til den akkurat er gjennomsteikt, ca. 4 minutt. Legg parmaskinka på eit steikebrett med bakepapir, og steik sprø i steikeomnen, ca. 5 minutt.

Potetmos

Skrell potet, skjer i biter og kok møre i lettsaltet vann, ca. 15 minutt. Slå av kokevatnet og mos potetene med en potetmosar eller ein gaffel. Tilsett smør og heilmjølk, og mos til ønska konsistens. Smak til med salt og pepar.

Appelsinsaus

Press safta av appelsin og sil over i ei kasserolle. Finhakk chili og ha i kasserollen. Kok opp og la det småkoke til mengda er halvert. Pisk inn crème fraîche og la sausen småkoke i ca. 4 minutt. Ta kasserollen av varmen og rør inn kaldt smør i terningar rett før servering.

Tilbehør

Steik spinat i smør til det fell lett saman, og smak til med salt og pepar. Server skreien med parmaskinke, potetmos, appelsinsaus og spinat.

Matspalta står på trykk kvar laurdag. Kari Ryslett og Mari-Lene Korsnes er spaltistar. Spalta er eit samarbeid mellom Vikebladet Vestposten og Møre-Nytt. OM SPALTISEN: Kari Ryslett arbeider med Matkultur- og helse ved Høgskulen i Volda. Ho har brei erfaring gjennom yrke- og arbeidsliv med mat, helse og opplæring frå ulike perspektiv. I Vikebladet Vestposten vil ho dele sine beste sjømatoppskrifter med lesarane og ho håper dette kan vere til inspirasjon til å velje å ete meir fisk og sjømat både til kvardags og i helga. Foto: Privat