Utstillinga ved Studio Hugo Opdal viser nye oljemåleri frå kunstnaren som deler sitt virke mellom lokala sine i Oslo, og ateliet sitt i Hjørungavåg. Utstillinga på Flø opner førstkomande laurdag (22. november)og held ope ut desember.
Håvard Vikhagen er utdanna ved Statens håndverks- og kunstindustriskole 1973-1975 og Statens Kunstakademi 1975-1983. Han blir rekna som ein av Noregs fremste kunstnarar. Han blir ofte teken med i den såkalla "gullrekka" av våre nolevande kunstnarar. Han har hatt utstillingar på Astrup Fearnley-museet, vore festspelutstillar i Bergen og hatt separatutstilling i heile tre salar ved Henie Onstad kunstsenter i 2004. Siste gongen han stilte ut hjå Studio Hugo Opdal på Flø, var i 2010. Håvard Vikhagen er innkjøpt av Museet for samtidskunst, Nasjonalgalleriet, Riksgalleriet og Astrup Fearnley Museet for Moderne Kunst, og fleire private samlingar.
Kunsthistorikar og noverande redaktør av magasinet KUNST, Mette Dybwad Torstensen skriv følgjande om kunsten til Vikhagen: “Vikhagens malerier balanserer mellom det abstrakte og figurative gjennom lag på lag med maling og materialer som sand, hår og rusk. De tre maleriene med tittelen "Kropper, personer, skikkelser" på Høvikodden symboliserer nettopp dette. Mot en kald lilla bakgrunn bukter noen merkelige mørke former seg. Skikkelser eller kropper? Uansett er de uformelige personene i oppløsning. Biter av noe som kan minne om fragmentariske fiberrester fra arkeologiske tekstilfunn bekler deler av figurene i forvridde positurer.”