Hjørungavåg Brass, under leiing av Svein Smørdal, bar instrumenta sine til topps og gav tonefølgje til salmar og liturgi. Roverane i Hjørungavåg stod for den praktiske tilrettelegginga og hadde fått på plass kross, altar og kyrkjeklokke.
Sokneprest Kristian Myklebust heldt preika.
Tradisjonen med friluftsgudsteneste på Melshornet skriv seg tilbake til 1980. I år var det derfor 35 år sidan tiltaket starta, medan årets gudsteneste skulle ha vore nr 36 i rekka. Men sidan det har vore messefall to gonger, var dette nr. 34 i rekka.
Den gongen i 1980 deltok 100, og Richard Pilskog var eldstemann på toppen med sine 85 år. I omtalen av hendinga skreiv Vikebladet den gongen slik: «Starten gjekk frå Ulset i 11-tida med ordførar Einar Holm i frisk spurt heilt i teten. Heile familiar både frå Hjørungavåg og Hareid sentrum følgde meir eller mindre hakk i hæl med res. kap. Arne Sørhagen som tok seg av dei bakarste og såg etter at dei også kom vel fram."
Det har vore ymsande vêr under dei ulike arrangementa. Nokre gonger praktvêr med sol i alle leier, andre gonger har det snødd. Seinast i 2010 snødde det. Kjentfolk meinte at snøfonnene i nordsida av Melshornet har vore så store som i år.
Talet på frammøtte i år var forresten det same som i 2012.
I innleiingsorda sine sa Kristian Myklebust at dette var det høgaste punktet han hittil hadde halde gudsteneste på. Melshornet er 668 meter høgt.
Før preika vart det lest frå både Jesaja 44,3-5 og Johannes 6,44-47. Jesaja-teksta kjem med lovnad om vatn som skal ausast og strøyme over det tørre landet og den som er tørst. Dette rennande vatnet er tolka til å vere Den Heilage Ande sin verknad på menneska – som ei gåve frå Gud og ikkje noko vi kan streve oss til.
Salmar under gudstenesta var «Den signede dag», «Kjærlighet er lysets kilde», «Hellig hellig hellig» og «Fagert er landet».