Island Offshore får miljøskryt

«Island Condor», eigd og drifta av Ulstein-reiarlaget Island Offshore, blir av hamna i Rotterdam kalla for det mest miljøvenlege skipet som har vore innom der dette hundreåret.

Rotterdam sitt hamnevesen skryt av «Island Condor», som dei meiner er det reinaste skipet som har segla innom hamna i dette århundre. Foto: Island Offshore.

Hamnevesenet i Rotterdam gir rabatt til skip som er miljøvenlege, og øvst på hamna si liste finn ein «Island Condor». Det skriv Sunnmørsposten.

- Ifølgje Environmental Ship Index er dette det mest reine havgåande fartøyet som har vore innom Rotterdam hamn dette århundre, skriv hamnevesenet på sine nettsider.

Plattform supplyskipet som er av Rolls-Royce-designet UT 776 CD blei lansert for å minimere utsleppa av NOx-og SOx-gassar i atmosfæren.

Island Offshore-sjefen meiner mannskapet skal ha mykje av æra for skrytet frå hamnevesenet.

- Mannskapet på våre fartøy set si ære i å operere skipa på ein miljøvenleg måte, seier Håvard Ulstein, administrerande direktør i Island Offshore, til hamnevesenet si nettavis.