– Det var tøffe forhandlingar kor vi dessverre ikkje kom i mål på våre viktigaste krav, seier forhandlingssjef i Yrkestrafikkforbundet (YTF), Linda Jæger.
Ho er særs skuffa over arbeidsgivarane sitt ønskje om å fjerne framforhandla goder.
- Lastebilsjåførane sitt lønnsnivå må løftast, då denne gruppa ligg på 83 prosent samanlikna med industriarbeidaren. Minstelønna på gods er allmengjort, så dette kravet vil ikkje forringe konkurransekrafta for norske godsbedrifter, seier Jæger.
Mekling - og kanskje streik
No blir det mekling i midten av juni, eller like over sommarferien, då Yrkestrafikkforbundet og Norsk Transportarbeiderforbund ikkje blei einige med NHO Transport og Norges Lastebileier-Forbund i lønnsforhandlingane fredag. Om det ikkje lukkast partane å bli einige her heller, kan det føre til streik.
Ein streik i lastebilnæringa kan mellom anna råke drivstofftilførsel og forbruksvarelevering.