I ei børsmelding kjem det fram at Havyard hadde eit driftsresultat på 29,5 millionar kroner i andre kvartal, og totalt 48,1 millionar kroner i løpet av første halvår 2016.
Konsernet skriv også at framdrifta på prosjekta dei har sett i gong er i tråd med planane. Men, administrerande direktør Geir Johan Bakke og Havyard er også ærlege på at hovudutfordringa no er å sikre nok aktivitet ved Havyard Ship Technology, verftet i Leirvik, i 2017.
- Det er god prosjektaktivitet innan fokusområda vind, isbrytarar, oppdrett og fisk, men avgjerdslene dreg ut i tid og det er også aukande konkurranse og press på marginane. Basert på talet på prosjekt og normal prosentdel som resulterer i effektive kontraktar ser det lysare ut for 2018. Det er stort fokus og motivasjon i organisasjonen på å halde fram prosessane som gir auka konkurransekraft for å kompensere for prispresset, skriv konsernet i pressemeldinga.
Nye kontraktar
Havyard Design & Solutions AS har nyleg inngått kontrakt for levering av design og utstyr for bygging av eit Havyard 832 fleirbruksskip. Skipet skal byggast ved verftet Cemre i Tyrkia, og kontraktsverdien er på i overkant av 100 millionar kroner.