Bank fryktar ny tapsbølgje i offshorereiarlaga

Offshorereiarlaga bør kvitte seg med skip for å unngå konkursar og hindre større banktap, oppmodar storkreditoren Sparebank 1 SMN, som har over seks milliardar kroner uteståande i den kriseramma næringa.

Sparebanken 1 SMN fryktar ei ny tapsbølgje for offshore-service-næringa og meiner det er behov for å redusere kapasiteten gjennom sal av skip og fusjonar. Her er fire av skipa til Olympic Shipping, som måndag igjen fekk utsett fristen for å komme opp med ei finansieringsløysing. Foto: Svein Ove Ekornesvåg / NTB scanpix / NPK

Banken fryktar ei ny tapsbølgje i næringa, skriv Dagens Næringsliv.

På kundelista står mellom andre sunnmørsreiarlaga Rem Offshore, Havila og Olympic Shipping. Olympic fekk måndag enda ei veke på seg til å ordne finansieringa med fleire bankar, obligasjonseigarar og tilførsel av minst 400 millionar kroner i frisk eigenkapital.

Fusjonar nødvendig

Administrerande direktør Finn Haugan i Sparebank 1 SMN har sett utlånstapa til banken innanfor offshore vekse til rundt ein halv milliard kroner. Haugan trur no det er heilt nødvendig med fusjonar og færre serviceskip om ein skal kunne unngå konkursar og store tap i bankane.

– Overkapasiteten kjem av at det lenge var høg oljepris og lovande utsikter for offshoresektoren. Delar av tonnasjen må takast ut, seier Haugan til Dagens Næringsliv.

Kan tape 1,2 milliardar

Haugan sa da han la fram kvartalsrekneskapen til banken måndag, at Sparebank 1 SMN i verste fall ser for seg eit tap på til saman 1,2 milliardar kroner på offshore. I dette scenarioet har banken rekna med fleire konkursar og sal av ein del skip til rundt halvparten av verditaksten.

I tillegg kan det bli behov for delvis gjeldslette – såkalla haircut – for å redde enkelte selskap.