Skipsverfta ser stadig nye moglegheiter utanfor offshoreindustrien, og talet på søknadar på lån frå Norsk Eksportkreditt vitnar om at aktørar innan miljøteknologi og fastlandsindustri er på frammarsj. Talet på søknadar er høgare enn nokosinne før. Det skriv Eksportkreditt Norge i ei pressemelding.
Berre i fjerde kvartal 2016 fekk Eksportkreditt Norge inn 79 søknadar om finansiering til eit samla søknadsvolum på 21,9 milliardar kroner. Den låge oljeprisen og nedgangen i investeringar i offshorenæringa gjer at søknadsmassen innan skipsfinansiering i aukande grad rettar seg mot passasjerfartøy, fiskebåtar, brønnbåtar og serviceskip for offshore vindparkar.
Snudd på hovudet
I januar 2015 var heile 82 prosent av ordrereserven til norske verft offshoreskip. I september 2016 hadde talet sunke til 42 prosent.
- Tala bekreftar at omstilling skjer innan enkelte segment. Spesielt gjeld dette hos skipsverfta, som held fram med å dreie fokuset frå offshorefartøy til andre fartøy. Vi er imponert over omstillingsevna verftsindustrien som heilskap viser, seier Otto Søberg, administrerande direktør i Eksportkreditt Norge.