Endret: 22.02.2012 kl. 16:26
Andreas Røyseth, Sales & Marketing Manager, opplyser om at det er morselskapet PG Marine Group som har sikra dei nye produksjons- og kontorlokale i Dragsund industriområde i Herøy kommune. Dei har inngått avtale med Ulstein Marine Technology om å overta «Hydrakraftbygget».
Dette er ein del av PG Marine si framtidige satsing mot det maritime miljøet i regionen, og ikkje minst knytt til den forventa ratifiseringa av IMO’s lovgjeving om behandling av ballastvatn.
– Desse lokala var i utgangspunktet bygd og tilpassa produksjon av avansert maritimt utstyr, og inneheld svært gode produksjons- og testfasilitetar for denne type utstyr, seier Røyseth.
PG Hydraulics overtek lokala 1. mai i år. Dei vil vere operative i nye lokale i løpet av mai. Dei har starta detaljplanlegginga for utnytting av lokala for å sikre at dei skal betene kundane på ein effektiv, sikker og konkurransedyktig måte.
Plass til leigetakarar
Bygningsmassen består av totalt 2000 kvadratmeter, og inneheld gode logistikk- og krankapasitetar og gjev mykje areal.
Det store arealet gjev selskapet høve til å leige ut delar av bygget til supplerande verksemder.
Det er viktig for PG Marine Group at dei er lokalisert i nærleiken til kystbyen Fosnavåg og det komplette maritime miljøet der.
– Lokaliseringa i Dragsund Industriområde er for oss ei sentral plassering, dette området gjev oss tilgang på arbeidskraft frå Vanylven i sør, Ørsta/Volda i aust og Ålesund i nord. Leiinga i PG Hydraulics ser på denne investeringa som ei tillitserklæring frå eigarane våre, forklarer Røyseth.
Positiv utvikling
PG Hydraulics har hatt ei positiv utvikling det siste året, med god kapasitetsutnytting, og er ein av dei definitivt store produsentane av hydrauliske aggregat for maritim sektor.
Det siste året har selskapet vekse jamt, både i omsetning og talet på tilsette.
– Utan denne investeringa kunne lokala vi nyttar i dag på Mjølstadneset blitt ein avgrensande faktor for den vidare satsinga vår. Den positive utviklinga er eit resultat av satsing og tillit frå eigarane våre, samt dyktige medarbeidarar.
