Fire milliardar til krisetiltak i vest og sør

Ei tiltakspakke på fire milliardar i statsbudsjettet skal bøte på krisa i oljenæringa og den aukande arbeidsløysa, som no særleg rammar Vestlandet og Sørlandet, ifølgje Dagbladet.

Eitt av tiltaka skal vere tilbod til arbeidsledige ingeniørar om pedagogisk opplæring til dei som vil bli realfagslærarar, etter det avisa erfarer.

Elles dreier tiltaka seg i hovudsak om framskunda vedlikehald av forsvars- og forskingsskip og vedlikehald av veg, bygg og bane. Det skal òg vere aktuelt å leggje til rette for fleire elektriske ferjer langs kysten.

Regiondirektør Torill Ytreberg i NHO i Møre og Romsdal er glad for alle tiltak.

– Bygging av fartøy og ferjer er òg veldig positivt for oss på Vestlandet, men da hastar det å komme i gang, for kompetansen er i ferd med å forsvinne. Anbodsrundane gjer jo at det fort kan ta litt tid å komme i gang, seier Ytreberg til Dagbladet.