I ei pressemelding frå Støttegruppa etter 22. juli i Møre og Romsdal går det fram at Sveinung Hjetland frå Sunndal er valt som ny fylkesleiar. Han tek over etter Hege Løseth, som har vore leiar av gruppa sidan oppstarten.
- Det er framleis mange og store problemstillingar knytt til terroren 22.juli, sjølv om det snart er fem år sidan. Vi har over 100 medlemmar i Møre og Romsdal, og min fremste jobb blir å vidareføre aktivt likemannsarbeid mellom medlemmar, kontakt med regionale myndigheiter i fylket og støttegruppa på nasjonalt plan, seier Hjetland i pressemeldinga.
-Det har vore ei underleg og lærerik reise. Eg er takksam for måten Fylkesmann Lodve Solholm med sine helse og beredskapsavdelinger ønska å nyttiggjere seg erfaringane etter 22.juli i opprettinga av Nettverk for Psykososiale Kriseteam i Møre og Romsdal med eigen fagleiar i prosjektstilling. Dette hevar kvaliteten på krise og oppfølgjingsarbeid i kommunane. Slik kan andre som opplever dramatiske hendingar i liva sine få betre oppfølgjing på grunn av det vi lærte etter 22.juli, seier Hege Løseth.