Charles Tøsse (H) er medlem i Samferdselsutvalet, Møre og Romsdal. Han understrekar at han deler ferjesjef Inge André Utåker si uro over at fylkeskommunen er seint ute i forhold til definisjon på kva slags ferjer det skal satsast på i neste anbodsperiode.
– På siste møtet i samferdselsutvalet fekk administrasjonen ei klar bestilling frå oss politikarane om å følgje opp saka, og vi kjem til å følgje saka tett, seier Tøsse.
Han opplyser at det var Høgre, KrF. og Frp. som i fellesskap på siste møtet fremja forslaget om ferjepakken med moderne nullutsleppsferjer som skal ut på anbod.
– Forslaget fekk støtte frå Venstre, kommenterer Tøsse.
Han opplyser at det ligg inne i forslaget at anboda skal gjelde for ein lenger tidsperiode, men at dette skal behandlast særskilt for kvar pakke som skal lysast ut.
Må bli betre
– Ferjesambandet Hareid–Sulesund er eit døme på at utlysinga i førre periode ikkje var presis og god nok. Denne gongen må vi syte for at det blir miljøvennlege ferjer som stettar behovet til både innbyggjarane og næringslivet, seier Tøsse.