Møre og Romsdal Venstre er denne helga samla til fylkesårsmøte i Ulsteinvik. Rundt 65 delegatar, frå Smøla i nord til Vanylven i sør, tek del på årsmøtet.

Mellom sakene som har blitt handsama på årsmøtet er mellom anna å få styrka Raumabanen.

- Slik kan vi får reduasert mengda av gods som i dag vert frakta med tungtransport langs vegen, seier Pål Grødahl frå Ulstein.

Ei anna sak det har vore arbeidd med er å sikre at det vert etablert statlege arbeidsplassar i Møre og Romsdal.

- Mellom anna kan ei etablering av politiet sitt lønsutbetalingskontor på Nordmøre kunne gi 140 arbeidsplassar, opplyser Pål Grødahl.

Han fortel elles at fylkesårsmøtet har vore prega av god stemning, der hovudmålet har vore å arbeide for fylket sitt felles beste.

Norsk landbruks mektigaste mann

Også stortingspolitikar Pål Farstad var til stades. Han er nyleg kåra til landets mektigaste landbrukspolitikar av avisa Nationen.

- Landbruk og fiskeri, dei to mest politiske næringane i landet, er viktige område for Venstre, seier Farstad.

Han forklarer at Venstre sitt grunnsyn når det gjeld landbruk er at heile landet må  takast i bruk , også der det er vanskeleg å drive jorda like effektivt. Dette for å oppretthalde busetnaden ute i distrikta, men også av omsyn til reiseliv og bukvalitet.

- Dette er noko eg er hyperoppteken av, seier Farstad.

Innvandring

Venstre har også markert seg i innvandringsdebatten den siste veka ved å avvise samtlige av innvandrings- og integreringsminister Sylvi Listhaug sine forslag til innstrammingar i asylpolitikken. Dette vart også diskutert på fylkesårsmøtet.

- Vi er ikkje ueinige i alle punkta, men i retorikken som vert ført, seier Lena Marie Landsverk Sande, ordførar i Vanylven.

- Det er integrering og inkludering som er nøkkelen for å lukkast, får ein til dette får ein også bort frykta for det ukjende og framande, seier Annika Brandal frå Hareid.

Kommunereform

Eit anna tema som vart diskutert var kommunereformen.

- Sjølv om nokon framles vegrar seg, har nok også dei fleste i Venstre innsett at dette er noko vi er nøydde til å vere med på, seier Pål Farstad.

Mellom kommunana på ytre søre er Hareid mellom dei som har kome lengst i prosessen, mellom anna har dei teke del i reformmøte med Ålesund og nabokommunane nord om Breisundet.

- Hareid ønskjer å sikre seg. Om samarbeidet med kommunane på ytre skulle strande, er det viktig at vi har klart eit alternativ med Ålesund og den prosessen må vi vere med på no. Når det er sagt så er vel Hareid Venstre sitt syn at vi helst vil få til ei samling på ytre søre, basert på det samarbeidet vi allereie har og dei geografiske tilhøva, seie Annika Brandal.