23. oktober er det klart for den årlege TV-aksjonen. Men for å få inn pengar til Røde Kors, treng Ulstein kommune frivillige bøsseberarar.
Steinar Torvik, varaordførar og leiar for aksjonskomiteen, oppmodar folk om å gå med bøsser. Folk kan registrere seg som bøsseberarar på nettstaden blimed.no.
Det går også an å ta kontakt med Kari Marie Øvrebø ved Ulstein rådhus, eller Inger Anne Dimmen ved Frivilligsentralen i Ulstein.
Årets TV-aksjon er altså tildelt Røde Kors. Aksjonen skal redde liv og gje omfattande helsehjelp til nokre av dei mest sårbare i verda, menneske som er råka av krig og konflikt.
Gjennom TV-aksjonen skal meir enn to millionar menneske få livsviktig hjelp.
Pengane som kjem inn under TV-aksjonen i år skal gå til Røde Kors sitt arbeid i ni land: Syria, Libanon, Sør-Sudan, Afghanistan, Myanmar, Somalia, El Salvador, Guatemala og Honduras. Pengane går også til å hjelpe flyktningar som har kome til Norge.
Røde kors er mange stader den einaste hjelpeorganisasjonen som slepp til med humanitær hjelp, og har gjennom lokale frivillige tilgang til dei som elles ikkje får hjelp. Gjennom TV-aksjonen skal fleire menneske i krig- og konfliktområde få livsviktige medisinar, helsehjelp, reint vatn og mat. Behovet er stort, og alle bidrag vil vere med på å redde liv.