– Grunntanken var å opne arbeidsmarknaden for fleire, å gjere oppgåver meir tilgjengelege. Så har vi utvikla appen vidare til å også kunne handtere vikarlister og lister over ekstrahjelp, inn mot både bedrifter, organisasjonar og kommunar, seier Håvard Ringstad.
Ulsteinvik-basert verksemd
Ringstad er dagleg leiar i Ulsteinvik-baserte Aido AS, og har fått med seg tre dyktige karar til, som hjelper til med utviklinga av funksjonen og designen til applikasjonen. I oktober var teamet på plass, og no er appen lansert.
– I Norge i dag plasserer vi ganske mykje ressursar på utsida av arbeidsmarknaden. Samstundes ser vi at vi treng meir ressursar for å handtere velferdssamfunnet. Vi ønskjer å opne opp arbeidsmarknaden meir og gi folk moglegheita til å skape moglegheiter for seg sjølve og andre. Gjennom Aido forenklar vi koplinga mellom behov for ressursar og ledige ressursar. Dessutan er dette ei ordning som skal leggje til rette for at folk jobbar kvitt, seier Ringstad.
Byggje referansebase
Han og resten av teamet ser på applikasjonen som ei innovativ løysing som opnar for auka deltaking i arbeidslivet, konstruktiv ressursdisponering, i tillegg til at oppgåver som i dag står uløyste eller som må løysast av oppgåveeigar, kan utførast av andre mot betaling.
– Tenesta vil gi ei ny opning for ungdommar, innvandrarar eller andre til å kunne prøve seg i arbeidslivet, og slik sett byggje opp ein referansebase med tanke på vidare jobbmoglegheiter.
Ta til dømes ein ungdom som ønskjer å jobbe litt på sida av skulegangen. Etter at oppdraget er utført kan både oppdragsgjevar og oppgåvetakar gi kvarandre ei rangering, alt etter kor nøgde vedkomande var med jobben som blei gjort. Betaling for oppdraget skjer også gjennom applikasjonen.
Får ein som brukar av appen tilbod om ein jobb, kan ein enkelt og greitt velje å vise interesse for den. Har ein først meldt interesse, bør ein så følgje opp om ein får den.
– Vi er sjølvsagt avhengige av at folk ønskjer å dele arbeidsoppdrag på denne måten. Vi kan ikkje gjere det for folk, men vi kan leggje til rette for det, gjennom løysinga vår. Saman skaper vi moglegheiter, fortel Håvard Ringstad.
Ressurspoolar
Applikasjonen skal også gje bedrifter, organisasjonar og kommunar moglegheita til å kunne forvalte eigne ressurspoolar og vikarlister på ein effektiv, konstruktiv og dynamisk måte.
– Samhandlinga mellom organisasjon og person blir vektlagd, seier Ringstad.
Ein av verksemdene som allereie har prøvd løysinga er Pelagia Liavåg, som har store svingingar i storleiken på arbeidsstokken grunna sesongvariasjonar i fisket.
– Dei har vore ein veldig flott pilotkunde, der vi verkeleg har fått testa applikasjonen for det den skal kunne gjere for denne typen kundar.
Ringstad fortel at også barnehagar, skular, hotell, verksemder og organisasjonar tufta på frivillig arbeid, i tillegg til butikkar, kan ha god nytte av denne applikasjonen.
Fleire har tru på løysinga
Aido AS har fått full støtte frå Innovasjon Norge, i tillegg til at ein privat aktør er inne på investorsida. Etter sommaren held Aido as moglegheitene opne for å ta inn nye eksterne investorar, fortel Ringstad.
– På kundesida skjer det også mykje, seier han.
