Monica, ektemannen Tor Dimmen og dei to borna deira på 15 og 17 år bur høgt og fritt i Hofsetsvingane i Ulsteinvik. Dit flytta dei for eit par år sidan fordi MS-diagnosen til Monica gjorde at dei ville bu enklare enn i ein einebustad med hage.
I dag jobbar ho halv stilling i Sparebanken Møre, og er halvt uføretrygda.
Tvillingsøstera har same sjukdom
Den siste MR-undersøkinga synte at sjukdomen har forverra seg, og Monica veit så inderleg vel kva MS kan føre med seg. Tvillingsøstera Kathrin fekk MS-diagnosen før Monica, og ho er i dag svært råka av sjukdomen.
– Eg synest det er heilt forferdeleg å sjå kor dårleg Kathrin har blitt, så for meg er det ikkje noko alternativ å ikkje gjere alt som står i mi makt for å stanse utviklinga. Eg må gripe sjansen før eg blir verre, seier Monica.
Ho har derfor søkt om få stamcellebehandling ved eit spesialsjukehus i Moskva.
22. januar
For tre veker sidan fekk ho svar om at ho skal få kome til konsultasjon ved sjukehuset 22. januar neste år. Då vil dei 3–4 første dagane gå med til omfattande undersøkingar, for å avdekke om ho er sterk nok til å tole den kraftige behandlinga ho skal gjennom. Er ho det, så vil behandlinga bli sett i verk umiddelbart.
I korte trekk går behandlinga ut på å ta ut stamceller frå kroppen hennar, reinse dei, og så setje dei inn att.
– Men før dei reinsa stamcellene kan setjast inn att må eg gjennom ein sterk cellegiftkur for å bryte ned immunforsvaret mitt. Eg veit at det blir tøft, og eg veit at behandlinga ikkje er utan risiko, men eg vil prøve likevel, seier ho.
Tidlegare var Monica svært aktiv fysisk. Ho spelte fotball, volleyball, dreiv med aerobic og var spinning-instruktør, og ho føler ho framleis har ein viss styrke i kroppen.
– MS er ein sjukdom med mange andlet. Førebels har det ikkje gått så mykje ut over styrken i beina på meg, men eg har problem med konsentrasjonen og er plaga med fatigue (utmatting).
Vipps-aksjon
Behandlinga i Moskva kjem på 500.000 kroner, og vener har no sett i gang ein Vipps-aksjon på Facebook slik at mest mogleg av utgiftene skal bli dekte. Vippsnummeret er 93052175 og kontonummeret er 3910 24 47240.
– Eg set stor pris på dette initiativet. Det er godt å vite at folk bryr seg, seier Monica.
Også ektemannen Tor er glad for engasjementet:
- Vi vil helst klare oss sjølve, men er glade for engasjementet, seier Tor, som for sju-åtte månader sidan miste jobben sin i oljebransjen.
Då Monica fekk det positive svaret frå Moskva, fekk ho beskjed om å kutte ut alle medisinar.
– Akkurat det synest eg er litt nifst, men eg gjer sjølvsagt som dei seier.
Medisinen kostar 250.000 kroner i året, og blir betalt av norsk helsevesen. Så dersom behandlinga blir vellykka, vil dei 500.000 kronene blir spart inn i løpet av to år.
Når Monica reiser til Moskva blir ektemannen med.
– Det er Monica som må gjennom den tøffe behandlinga, men heile familien er sjølvsagt spente, og eg ønskjer å vere nær henne, seier han.
For lite forsking i Norge
I fjor fekk om lag 70 nordmenn same behandlinga som Monica skal gjennom ved sjukehuset i Moskva. I Norge blir denne behandlingstypen brukt i svært liten grad, dette fordi norske helsemyndigheiter meiner det er knytt uvisse til effekten av stamcellebehandling. Helseminister Bent Høie (H) ønskjer at det skal setjast i gang ein studie som vil gi fleire pasientar høve til å prøve stamcellebehandling. Men dette er fram i tid, og Monica føler ho ikkje kan vente.
Med på turen blir også eit ektepar frå Ålesund, der kona skal gjennom same konsultasjonar som Monica. – Eg håper vi får behandling begge to, smiler ho.
Monica har ikkje møtt andre som har vore gjennom denne type behandling, men ho har lese ein artikkel om ei kvinne frå Ålesund som fekk stamcellebehandling i Moskva for eit par år sidan, og ho har også maila med henne.
– Ho er no i full jobb igjen, og angrar på at ho ikkje tok behandlinga tidlegare, så eg må berre ta sjansen på at det skal gå bra med meg også, seier Monica.
