Det var ekspressbussar, av typen som har belte til alle sitjeplassane om bord og ingen ståplassar, som blei kontrollert av Statens vegvesen under ein storstilt kontroll i heile Midt-Norge førre veke. Brorparten av kontrollane blei difor gjennomført i Trøndelag, då det er mest ekspressbusstrafikk der. Men, det blei også gjennomført kontroll i Møre og Romsdal, blant 42 kontrollerte passasjerar var det berre éin som fekk gebyr for manglande bruk.
- Vi er veldig nøgde med at det var ein svært liten del av dei kontrollerte busspassasjerane som ikkje hadde festa på seg beltet, seier Annette Henden i Statens vegvesen Region midt.
- Beltebruken aukar
Gebyret for å ikkje feste på seg beltet på bussen er på heile 1.500 kr.
- Vi ser at beltebruken blant busspassasjerane aukar. Det hjelper å gjennomføre kontrollar og minne om at ein ikkje berre kan skade seg sjølv, men andre passasjerar, dersom det skjer ei trafikkulukke og ein ikkje er festa med belte i bussen, seier Henden.
Her er lista over talet på kontrollerte, og på kor mange som enda opp med å få gebyr:
Sør-Trøndelag
Kontrollerte: 600
Gebyr: 39
Nord-Trøndelag
Kontrollerte: 593
Gebyr: 8
Møre og Romsdal
Kontrollerte: 42
Gebyr: 1