Skuffa over hærverk på fleire trestøtter

Ulstein kommune opplyser at det i løpet av helga som var blei gjort hærverk på fleire trestøtter i Ulsteinvik sentrum.

Odd Kåre Wiik/Ulstein kommune.

Den eller dei som står bak hærverket har kutta banda på heile 40 tre. Ei handling som vil koste Ulstein kommune og skattebetalarane 12.000 kroner.

I følgje Ulstein kommune, som først skreiv om denne saka på sine nettsider, står trea på kommunal grunn langs Sjøgata og på grøntanlegga til Ulstein hotell og på Sjøsida. Hærverket som har vore gjort er omfattande, og Odd Kåre Wiik i teknisk etat fortel at det er kutta band på heile 40 tre.

- Vi likar sjølvsagt ikkje dette, seier Wiik.

- Nye støtteband inkludert arbeid kostar om lag 12.000 kroner, som vi gjerne kunne ha nytta til heilt anna bruk. Uansett - no har vi tinga vøling og vonar vi er ferdige med dette.

Kommunen opplyser elles om at trea som er råka er relativt unge, og at dei treng tre-støtter i nokre år til om dei skal kunne stå i mot haust- og vinterstormar.