Det å kunne nyte ein litt meir eksklusiv kebab gir god kjensle av helg og kos utan å vere typisk ”usunn fast-food”. Dette er rett og slett ein nordisk utgåve av kebab, og er fylt med gode norske smakar som lam, purre, sopp og tyttebær. Dersom du er på jakt etter noko skikkeleg snadder til middagskosen er dette noko å prøve i helga.
Retten ropar haust med sine gode norske råvarer som harmonerer nydeleg saman. Feitt frå lammekjøtet gjer at lammeskaven får sprø og gylden steikeskorpe når du steiker den på høg varme. Dette saman med god smak frå timian, rosmarin, kvitløk, kantarell og bittersøtt tyttebærsyltetøy gjer måltidet til ei smakfull affære. Server i mjuke pitabrød (gjerne heimelaga) og nyt!
Ingrediensar for 4 personar:
400 g lammeskav
200 g kantarell (evt. annan type sopp)
1 fedd kvitløk, finhakka
ca. 1 ts tørka timian
ca. 1 ts tørka rosmarin
salt & pepar
smør, til steiking
¼ purreløk
Til servering:
4 stk. pitabrød
lettrømme
tyttebærsyltetøy
fersk timian
Varm opp ei steikepanne og legg i kantarellen. Lat den steike på middels høg varme til den slepp ein del væske. Ha i litt smør og krydre med litt salt og pepar. Legg til sides. Ha ein klatt smør i panna og steik lammeskav på høg varme til den blir gylden på farge og får steikeskorpe. Skru ned varmen litt og ha i kvitløk og kantarellen. Krydre med rosmarin og timian. Smak til med salt og pepar. Skjær opp purre i ringar på ca. 1 cm og ha i panna. Lat det steike med i nokre minutt ekstra.
Varm opp pitabrød i mikrobølgjeomn eller steikeomn. Server lune pitabrød fylt med kjøt-og soppblandinga, tyttebærsyltetøy, rømme og gjerne litt fersk timian.
