Rise Bygg AS er straks klar til å starte arbeidet med Bjørndalvegen Park i Ulsteinvik.

– Oppdraget er stort og veldig viktig for oss, seier dagleg leiar Peter Rise.

Rise Bygg er hovudentreprenør når det skal byggast 43 leilegheiter fordelt på tre blokker i Bjørndalvegen.

– Vi skal ha mange i arbeid. Dei siste vekene har vi faktisk måtte permittere tilsette, men dei kjem i arbeid igjen når vi startar bygginga her i Bjørndalvegen, seier Rise.

Nesten to år

Det er selskapet Rome AS som står bak prosjektet. Rise Bygg og Rome har samarbeidd om ei lang rekkje bygg før, til dømes fleire i Saunesmarka.

Det har teke tid å gjere den såkalla Hydrotomta klar for bygging. Mellom anna måtte grunnen under bensinstasjonen reinast, etter at det hadde leke ut olje. YX Norge dreiv bensinstasjonen på tomta, og Tina Eilertsen i selskapet sa til Vikebladet Vestposten i november i fjor at det kosta nokre millionar å få fjerna den ureina massen.

Jogeir Romestrand i Rome AS fortel at prosjektet har vorte minst eit år forseinka. Planen er at prosjektet skal ha ei byggetid på nesten to år og stå ferdig hausten 2019.

– Det trur eg vi skal klare å halde, seier Rise.

– Stor interesse

På tomta skal det byggast tre blokker med til saman 43 leilegheiter. Kvar blokk har fem etasjar med leilegheiter, og husværa kostar mellom 1,5 og 7,9 millionar kroner. Den dyraste er allereie selt, det er heile toppetasjen på den eine blokka.

– Det er veldig stor interesse for prosjektet, fortel ansvarleg meklar i Eiendomsmegler1, Tommy Sylte.

Til no er femten av dei 43 leilegheitene reserverte, men først i neste veke vert husværa lagt ut for sal.

Trur du at alt vert selt før bygget står ferdig?

– Av erfaring kan det ta litt tid, men når folk ser korleis bygget vert sjåande ut, trur eg mange vil slå til, seier Tommy Sylte.

Han trur mange kjem til å verte overraska over utsikta og at dei to øvste etasjane kjem til å rage over Blåhuset.

Også Jogeir Romestrand i Rome AS er fornøgd med interessa rundt prosjektet, og trur det skal vere mogleg å få selt husværa.

– Og så har vi hatt ein veldig fin dialog med dei som vert naboar til bygga, seier Romestrand.

Fullt trykk

Rise Bygg AS har knapt tretti tilsette.

– Det er viktig for oss å få slike oppdrag av ein viss storleik, for at vi skal klare å halde kontinuiteten. I mange år har vi bygt både bustad- og næringsprosjekt både i Ulstein og Hareid, men den siste tida har det vore ganske stilt, fortel Peter Rise.

Kjem alle i arbeid frå første dag med Bjørndalvegen Park?

– Nei. Først skal tomta gravast ut. Så skal 6–7 mann gjere betongarbeidet, før det vert meir aktivitet utover i byggeperioden. Fullt trykk vert det først frå utpå hausten, til dømes med stålarbeid og snikring, seier Rise.

tomta: Tomta ligg sentralt i Ulsteinvik sentrum, mellom Ulstein Arena og Blåhuset. Foto: Linda Eikrem