Styreleiar for Ulstein LAN, Per-Olav Harkjerr Digre, fortel at planen var å ha 252 plassar i hallen. Hittil er det berre 134 påmelde. Det har vist seg at LAN krasjar med både konfirmasjonsleiren i vinterferien og Polenturen til ungdomsskulen i haustferien.
– Det er sjølvsagt litt skuffande, for vi har jo eit budsjett vi skal halde oss til. Det er som regel foreldra som betaler, og vi valde difor å senke prisen litt i håp om betre respons. Vi har også vurdert å flytte arrangementet til påska, men det slo vi frå oss, sidan Herøy LAN vert arrangert då. Vi vil ikkje kræsje med dei, ytrar Harkjerr Digre.
– Det er viktig med humor
Godt samarbeid
Han skryt av kommunen og deira engasjement i Ulstein LAN. Han angrar ikkje eit sekund på at dei inngjekk avtale om å leige Ulstein Arena, og fortel at det har vore deira draumelokale heilt sidan det vart kjent at det skulle byggast.
– Ikkje berre har vi større plass, og betre luft. Vi har også garderobar, soveplassar og ikkje minst høve til å bade for ein 50-lapp, ler han.
Kultursjef i Ulstein kommune, Leif Ringstad, er overraska over kor bra idrettshallen i Ulstein Arena fungerer som opphaldsrom for LAN.
– Det kjekkaste eg har sett under mine besøk på arrangementet, er all ungdomen som kosar seg i lag i vinterferien. Per Olav har gjort ein kjempejobb og vi er glade for å kunne hjelpe til, legg han til.
Mange sponsorar
Det er ikkje berre kommunen som har vist stort engasjement for årets LAN. Per-Olav er glad for interessa rundt datapartyet etter at det kom fram at dei skulle halde til i sentrum.
– Vi var jo litt anonyme då vi held til på Hasund, so det er kjekt å endeleg verte sett.
Hotellet har gitt datapartyet ein del hotellrom til redusert pris, og minst 10 av dei tallause butikkane ungdomane har vore innom, ynskjer å sponse med alt frå snacks, pizza og brus til premiar som kan delast ut når LAN har konkurransar innimellom spelinga.
– Vi set enormt pris på alt vi har fått og det er eit bevis for oss at lokalmiljøet er engasjert i det ungdomen driv på med. Vi hadde so absolutt ikkje fått dette til utan hjelpa frå kommunen og lokalsamfunnet, avsluttar Per-Olav Harkjerr Digre.