Månadsauken i matvareprisane var i juli større enn på tretti år. No lover daglegvarekjeda Kiwi å setje ned prisane.
Årsaka til prisauken på 3,2 prosent i juli var høgare prisar hos leverandørane og færre tilbodskampanjar. Kiwi-sjef Jan-Paul Bjørkøy seier til Aftenposten at prisauken var «heilt spesiell».
– Vi kjem til å setje ned prisane framover. Det kan eg seie med handa på hjartet, seier Bjørkøy.
Kiwi er lågpriskjeda til den største daglegvareaktøren i Noreg, NorgesGruppen, og har over 600 butikkar. I fjor var omsetnaden på 26 milliardar kroner. Kiwi-sjefen vil ikkje seie kor mykje prisane skal ned, men seier kjeda har budsjettert med «tøffare prisar».