Ishavsmuseet legg opp til fleire polarkveldar, vandreutstilling, familiedag og endå mykje meir denne hausten.
"Grønland for 100 år sidan"
Først ut er vandreutstillinga «Grønland for 100 år sidan» som opnar fredag 5. september. Utstillinga er laga av Uummannaq Polar Institute, Grønland, og utstillinga vert vist på Brandal i samarbeid med dei. Utstillinga består av handkolererte foto frå perioden 1909-1912.
Under opninga vert det kort foredrag av prosjektleiar for utstillinga Erik Torm. Utstillinga har i sommar stått på Frammuseet i Oslo, og skal stå i Aarvakhuset på Brandal til 20. oktober.
Thorseth med færing
Alt søndag same helg vert det familiesøndag ved museet med ulike aktivitetar for borna. Ragnar Thorseth kjem med færingen «Brattholm Havila», og i undervisningssalen vert vist film frå alle Thorseth sine ekspedisjonar. I kafeen vert det servert både middag og kaker.
Gunnar Myklebust
Gunnar Myklebust er første gjest under ein ny sesong polarkveldar 12. september. Gunnar held foredraget «Ishavet, pelsdyrfangst og vågemot» med tittel henta frå boka han gjev ut på Samlaget i haust. Det vert boklansering denne dagen, og tradisjon tru avsluttar museet kvelden med god mat.
også seinare ut over hausten blir det spennande kveldar ved Ishavsmuseet.