Tre av fire vidaregåandeelevar på Vestlandet skriv på dialekt på Facebook, men dei er ikkje dårlege i norsk av den grunn, viser ei ny undersøking.
Ungdommane er heller mulitlinguale og har stor evne til å veksle mellom fleire språkformer, viser undersøkinga som språkforskar Audhild Gegoriusdotter Rotevatn har gjort om språkbruken i dei sosiale media blant elevar på avgangstrinnet i den vidaregåande skulen på Vestlandet.
Rotevatn har gjort undersøkinga som del av eit masterstudium i skriftkultur ved Høgskulen i Volda, og resultata skal ho presentere ved høgskulen i samband med Forskingsdagane 23. september.
Gode i språk
– Mange bruker dialekt på Facebook og Snapchat, eit enklare og meir forkorta språk på sms, gjerne engelsk i ein blogg og normert bokmål eller nynorsk på skulen. Å skrive dialekt på Facebook er eit medvite val, og ikkje noko dei gjer fordi dei er dårlege i norsk, seier Rotevatn på nettsidene til Forskingsdagane.
Kor gode dei er i norskfaget, har Rotevatn funne ut ved å spørje elevane om karakterane deira.
Elevane var elles i gjennomsnitt på Facebook éin time kvar dag. Ungdommane seier at dei skriv dialekt fordi det er slik dei snakkar, men at det òg har noko å seie at Facebook-vennene deira gjer det.
– Det ser ut til å vere ei uformell norm som seier at dialekt er ok på Facebook, seier Rotevatn.
