Fekk Paul Harris under 50-årsfesten

Høgdepunktet under Hareid Rotary sin 50-årsfest laurdag var utan tvil då Egil Utgård heilt utan førevarsel vart tildelt Paul Harris.

Paul Harris er den høgaste utmerkinga ein rotaryanar kan få. På dei femti år klubben har eksistert, er Utgård nummer 15 som får utmerkinga. Men utmerkinga kan også gjevast til personar som ikkje er medlemer av klubben. I Hareid er det tre personar utanom: Svein Smørdal, Solbørg Pilskog og Ingrid Stennes.

Ein ekstra innsats

Vilkåret for å få Paul Harris-utmerkinga er at personen har gjort ein ekstra innsats for klubben og/eller lokalsamfunnet.

Egil Utgård har vore medlem i Hareid Rotary Klubb sidan 1972, og klubbmedlem Einar Holm hadde ei både lang og grundig grunngjeving over kvifor Egil Utgård skulle få utmerkinga.

- Egil har opp gjennom åra vore med i dei flest komitear og dugnadsprosjekt. Der Egil har ansvaret blir det aldri noko halvgjort. Han er fagmann til fingerspissen, sa Einar Holm, og karakteriserte Utgård som ein sann rotaryanar.

- Du er lyttande, passeleg beskjeden, men har likevel fått utretta mykje. Hareid kommune bør takke foreldra dine som i si tid flytta til Hareid, la Holm til.

Han peika også på at Egil Utgård har vore ein industriutviklar i Hareid, og at møbelfabrikken som Utgård sette opp i Hareidsmyrane har vore med på å sikra over 100 arbeidsplassar i kommunen.