Hareid Historielag vil i 2015 gjennomføre ei større nysatsing. Laget har inngått avtale med Fantastiske Osberget, som har utvikle logo og nettside for laget. Samtidig skal byrået produsere årsskriftet og vere med i redaksjonsnemnda.

Fornyinga av årsskriftet inneber at boka no vil kome ut årleg med nytt namn, stive permar, ny layout og nytt format. Boka vil heite «Ei tid va’», som i si tid var namnet på bøkene Peder Måseide gav ut gjennom Hareid Historielag.

Nettside

Gjennom samarbeidet med Fantastiske Osberget har Hareid Historielag denne veka lansert si eiga nettside. Her vil alle interesserte finne historiske artiklar og bilete. Her finn du også informasjon om laget – og om arrangement og liknande i lagets regi.

– Denne fornyinga er nødvendig for å skape større engasjement og interesse for lokalhistorie i Hareid, knyte band bakover og slik vere med på å lyfte fram kunnskap om den lokale historia. Kjennskap til vår eiga historie vil gjere oss betre rusta til å møte framtida. Ikkje minst håper vi å vekke interesse for lokalhistoria mellom skuleelevar og yngre menneske, seier leiar Finn Sindre Eliassen i Hareid Historielag.

Velvillige forfattarar

Årsskriftet har eksistert i 41 år, og det har vore lagt ned eit stort tal frivillige timar i alle desse åra. Tidsskriftet til Hareid Historielag har fram til 2014 kome ut annakvart år. No blir det altså årleg.

Historielaget hadde aldri klart å skape Årsskrift for Hareid historielag utan dei mange velvillige forfattarane rundt om i bygdene i Hareid. Dette arbeidet vil vi føre vidare og forsterke i den fornyinga som no står føre, slår Eliassen fast.

For 2015 har styret i historielaget sett ned ei eiga redaksjonsnemnd som skal samle inn stoffet. I redaksjonsnemnda sit Finn Sindre Eliassen, Marit Kvammen, Einar Holm, Reidar Hareide, Magne Grimstad jr og Asle Geir Widnes Johansen.