Administrasjonen har byrja arbeidet med å kutte nærare 10 millionar kroner for andre halvår av 2015. Kommunestyret vil handsame denne saka på junimøtet.
– Kvifor må de kutte ti millionar?
– Det er fleire grunnar til det. Den eine årsaka er underbudsjettert tilskot til dei private barnehagane. Den andre årsaka er at barnevernet treng meir pengar. Det tredje er ei forventing om auka pensjonskostnader. KLP har fått lita avkastning på fond og aksjar, så då må kommunane inn med meir pengar. Det fjerde er behov for styrking av økonomisk sosialhjelp, dessutan ventar kommunen ein nedgang i skatteinntektene, svarer rådmann Einar Vik Arset.
Gjer som næringslivet
– Har de byrja på arbeidet med kuttliste? Vil du røpe kvar de skal spare?
– Me held på med ei slik liste, men er ikkje ferdig. Me vil prøve å gjere det så skånsamt som mogleg. Kommunen må til med omstillingar, slik som næringslivet må i desse tider, kommenterer Arset.
Vil tilsetje planleggjar
Ulstein formannskap har møte i dag, tysdag. Dei vil der vedta om dei skal tilsetje ein planleggar i eit toårig engasjement, som rådmannen rår dei til.
I sakspapira står det kort om innsparinga på 10 millionar, og at dette vil få nokså store konsekvensar for driftsbudsjetta for kommunen. Teknisk etat er budd på å ta sin del av innsparingane til trass for tilrådinga om å tilsetje ein planleggar.
Få til å planlegge
Fram til 2011 hadde kommunen 2,8 stillingar som hovudsakleg arbeidde med planspørsmål. Men etter kvart som folk har slutta, har stillingane stått vakante. Frå 2012 og til no har det berre vore ei stilling ved etaten som har hatt planlegging som hovudarbeidsområde. På grunn av at kommunen hadde «ferske» kommuneplanar på det tidspunktet har dei greidd seg greitt, men no treng planane rullering.
– Landbrukskontoret eiga sak
Ulstein kommune vurderer å trekkje seg ut av Landbrukskontoret for å få pengar til planleggar, men rådmannen vil ikkje gå med på at om formannskapet no vedtek å tilsette planleggar, må dei i neste omgang trekkje seg ut av landbrukskontoret. Ulstein vil no ha møte med dei samarbeidande kommunane om landbrukskontoret.