Alle naudetatane vart varsla etter å ha fått melding om at ein mann hadde ramla i sjøen då han skulle fortøye båten sin i hamna i Fosnavåg natt til søndag. Medan dei var på veg fekk mannen hjelp til å kome seg på land. Han var uskadd, men det synte seg at han var rusa og hadde over lovleg promille. Han vart difor tatt med til lensmannskontoret i Ørsta/Volda for prøvetaking, melder operasjonssentralen for Sunnmøre.

I båten låg det også ein annan kar. Han var også rusa og hadde sove seg gjennom det heile. Etter at politiet hadde reist frå staden vakna han etterkvart til, kasta loss og sette kursen ut av hamna, mot Runde.

Der vart han kontakta av politiet som kunne konstatere at også han hadde over lovleg promille. Også han vart difor tatt med til lensmannskontoret for prøvetaking.

Begge mennene er i 40-åra og er heimehøyrande i Herøy. Politiet opprettar sak på begge to, for føring av båt i rusa tilstand.