Ungdommane vil ha samspel med kommunen

Fylkesmann Lodve Solholm og fleire med han var på Hareid-besøk torsdag. Han fekk høyre kor det står til med kommunen. – Ta godt vare på dei unge, dei er framtida, oppmoda Solholm.

Marthe Emilie Hansen (med plakaten), er både leiar for Hareid Arbeidarparti og medlem i Ungdomspanelet. Ho hadde med seg Thea Gjerde Rise og Ovar Hatløy frå Hareid ungdomsråd. Trioen ynskjer eit betre ungdomsråd i Hareid kommune, og oppmodar kommunen ved ordførar Anders Riise (t.v.) til betre samspel. Fylkesmann Lodve Solholm sa seg einig i mykje av det ungdommane la fram. Foto: Ole-Ottar Høgstavoll.

– Hareid er ein trygg kommune å vekse opp i. Men, det er fleire ting vi føler vi manglar. Vi vil ha tilbake MOT, eit godt førebyggande program, vi vil ha ein ungdomsarbeidar, og det hadde vore forferdeleg trist om ungdomsklubben blir lagt ned. Vi oppmodar politikarane til eit samspel med oss i Ungdomsrådet kring desse tema, fortalde dei tre ungdommane frå Ungdomsrådet i Hareid og Ungdomspanelet.

Fylkesmann Lodve Solholm gjekk umiddelbart fram etter innlegget, og sa seg einig i mykje av det ungdommane fortalde.

– Eg oppmodar Hareid kommune til å satse på MOT-programmet igjen, og å satse det dei kan på ungdommen. Dei representerer framtida vår, ta godt vare på dei, seier Solholm.

Hareid kommune var nummer 33 av totalt 36 kommunar i fylket, som fylkesmann Lodve Solholm og apparatet rundt han har vitja.

– Robek ein hemsko

Hareid-ordførar Anders Riise (H) var førstemann på programmet. Han fortalde delegasjonen frå fylkesmannen sitt kontor, deriblant assisterande fylkesmann Rigmor Brøste, om stoda i kommunen.

– Vi er den sjuande største industrikommunen i fylket, men vi har også høg arbeidsløyse. Vi er på Robek-lista, noko som har blitt ein hemsko, spesielt for næringslivet, sa Riise.

Han poengterte også nok ein gong for fylkesmannen at problema med sambandet Hareid-Sulesund er noko fylket må følgje med argusauge.

Lodve Solholm heldt så sitt innlegg, der han fokuserte mykje på fylkesmannen si rolle og kommunereforma. Fylkesmannen reiser i desse dagar rundt for å vise fram eit dokument dei lagar for kvar enkelt kommune, eit kommunebilete, ei slags handbok, spesielt for alle som skal handsame saker for kommunane.

– Vi er unikt interesserte i Hareid kommune. No veit vi at Hareid har utfordringar knytte til Robek, og at spesielt næringslivet i kommunen føler dette har blitt ein hemsko. Vi følgjer med, seier Solholm.