Under Opplev Hareid blir det i år brukskunst som skal fylle lokalet til Hareid kunstlag.
– Vi har fått med oss 6-7 utstillarar, fortel leiar Kari Janne Nevstad Ringstad i Hareid kunstlag.
Brukskunstutstillinga blir i lokalet som laget disponerer i Kjøpsmannsgata på Hareid.
Den offisielle opninga blir torsdag 2. juli, med musikalsk innslag og fleire av brukskunstnarane til stades.
Karl Oskar Jordan Breivik har firmaet Fyndel og er frå Ørsta. Han har blant anna arbeidd i Kautokeino i Juhls sølvsmie. Han lagar smykke av gamle bestikk, og blandinga av ulike element i stein og gravering gir spennande produkt.
Adrien Herve held til i Ålesund hos Ingrids glassverksted. Han er frå Landerneau i provinsen Bretagne i Frankrike. Han har mellom anna ulike professional training sertificats. Herve har vore med på fleire utstillingar i utlandet, og har eit spennande uttrykk i glaskunsten sin.
Editn Kvalsund held til på Nerlandsøya i Fosnavåg. Ho vil delta med keramikk, og lagar ulike ting som blant anna hengande lysbåtar og lundefuglar. Ho har delteke på utstillingar fleire stader.
Ingeborg Hofseth bur i Ulsteinvik. Ho har vove i mange år, og har lenge vore engasjert i Hareid vevstove. Deltek med løparar.
Kari Elin Inreeide Grimstad deltek med noko vev og dekortrykk på ull og ullfellar. Ho har bak seg mellom anna fleire kursopphald i dette arbeidet, og har eige utsal i Haeid sentrum.
Ester Bachke arbeider med applikasjon og broderi. Veggteppa hennar er laga av brukt materiale. Ho har ein filosofi om at ein ikkje treng om å kjøpe nytt for å skape vakre ting.
Agathe Lin Riise deltek med skulptur. Ho har utdanning både innanfor form og farge og kunstfag, og studerer kunstfag ved Høgskulen i Volda. Ho likar å jobbe med crossover i materiale og i eigenskapar, utforskar komposisjonar i kontrastar og materiale.
Utstillinga er open til og med 5. juli.