For Sandnes Ulf-keeper Saku-Pekka Sahlgren si involvering før Robin Shroot enkelt kunne tuppe ballen i mål til 1-0 for Hødd var alt anna enn heldig. Han fekk fomla ballen opp i tverrliggaren, før Robin Shroot kom og fekk tak i den då den datt ned, og sette den i mål forbi ein forfjamsa sisteskanse.
Hødd si målvakt derimot, hadde fleire særs gode involveringar i søndagens oppgjer. I tillegg til to-tre matchvinnarredningar var han god både i feltet og på strek.
- Dette var utruleg deilig. Vi har hatt marginane mot oss i fleire kampar no, og har ikkje klart å få den sigeren vi har håpa skulle kome. No får vi endeleg betalt for arbeidet vi legg ned, og eg er veldig glad på heile laget sine vegner, seier Jan-Lennart Urke til Vikebladet Vestposten.
- Vinn fullt fortent.
Urke var veldig stolt over prestasjonane til laget mot Sandnes Ulf, og innrømte etter kvart at også han hadde ein god dag på jobb.
- Det var deilig å få ein smultring, som ein seier. Det var ein relativt god kamp av meg i dag, og det var ekstra herleg å prestere når også resten av laget gjer ein så god kamp, seier Urke.