Årets utgåve av fjelløpet Melshorn Opp vert neste laurdag formiddag med start på Ulset.
Arrangør Hjørungavåg IL gler seg til å vidareføre dette arrangementet som fekk sin debut i fjor i høve 70 års-jubileumet til idrettslaget.
Fjelløpet var i fjor eit av tre arrangement i høve jubileumsfeiringa. Stor deltaking og engasjement då gjorde at idrettslaget beslutta å gjere dette til eit årleg arrangement i september.
Det vert premiering også i år til alle deltakarar, både i mosjonsklassa og i konkurranseklassa. I tillegg kan idrettslaget by på ei offisiell Melshorn Opp t-skjorte til denne utgåva av fjelløpet. Alle deltakarar i konkurranseklassa får denne flotte t-skjorte ved registrering/påmelding. Den vert og lagt ut for sal ved startområdet på Ulset. Mosjonistane startar et par timar før konkurranseklass, slik at det vert høve til å sjå løparane i løypa eller ved målområdet på toppen. I fjor var vinnartida 26.12 minutt, det var Eirik Voksøy Bringsvor som då sette rekorden og har bestetida frå i fjor.
– Vi vonar at mange vil ta turen til topps denne dagen, anten det er i stor eller i god fart saman med venner og familie. Fjelløpet har rom for alle, seier leiar i idrettslaget Kjetil Nesset, som oppfordrar familiar til å legge friluftsturen denne helga til laurdagen. Her kan du konkurrere mot deg sjølv, naboen, vennar, kollegaer, slektningar og elles kjende. Eller rett og slett kose deg i naturen med denne løypa opp og gjerne ned att i ei av dei mange andre råsene i turløypeterrenget som trimgruppa i idrettslaget har fått rydda, oppfordrar leiar i trimgruppa Ottar Pilskog.
Melshorn er 3. høgste fjellet på øya, og måler 668 meter over havet. Med start på Ulset er løypa ca. 3,4 km lang og stigninga er ca. 600m.
Idrettslaget har og i eit års tid arbeidd med å realisere ei utbygging av Jomsvoll. Det er gitt byggeløyve, og utbygginga av kunstgrasbane med flomlys vert starta opp om ca. ei veke.
Det vert arbeidd vidare med finansiering av fotballhall.
