Hødd 2 – Florø 2 4-0 (2-0)
Høddvoll
Mål: 1-0 Sander Djupvik (22), 2-0 Djupvik (28), 3-0 Gustav Dimmen (51), Bastian Rasmussen (78)
Dommar: Haakon Javier Tronstad.
Gule kort: Håkon Botn Brautaset, Torje Naustdal
Hødd2: Sivert Pieroth – Johannes Sundgot (Isak Saunes Roald 67), Daniel Eid, Aleksander Rekdal (Gustav Dimmen 46), Martin Mork Breivik – Elias Flø, Sveinung Tilseth Sæterås, Sander Djupvik – Håkon Botn Brautaset, Isak Haanes, William Fjørtoft (Bastian Rasmussen 67).
Hødd 2 var vertar for Florø 2 til årets siste seriekamp i 3.-divisjon avdeling 08 laurdag. Begge laga er klare for 4.-divisjon i 2017, men medan Hødd 2 hadde sjansen til å klatre opp til ein 6.-plass om resultata i den siste runden gjekk deira veg, ville bortelaget uansett ende på ein 12.-plass.
Begge laga stilte ungt frå start, og med få folk på innbytarbenken. For heimelaget sin del skuldast det naturleg nok at Hødd spelar viktig kamp heime sundag, og Martin Mork Breivik var derfor einaste innslag frå A-troppen.
Det var likevel heimelaget som fekk den beste opninga, og etter 22 minutt tok Hødd 2 leiinga ved Sander Djupvik. Då hadde laget allereie hatt ballen i mål ein gong, ved Martin Mork Breivik, men den gongen vart det annullert for offside.
Og Djupvik gav seg ikkje på eitt mål, for fem minutt seinare vart han igjen spelt gjennom i midten og plasserte ballen sikkert i hjørnet til 2-0.
Heimelaget skapte jamt over litt meir enn Florø 2, men bortelaget fekk ei brukbar moglegheit etter 32 minutt, då Hødd-forsvaret gav vekk ballen på eigen halvdel. Det enda med innlegg frå høgre, som Aleksander Fjørtoft så vidt fekk unna, men Hødd-spelaren måtte ha behandling etter eit hardt møte med bakken.
Sveinung Tilseth Sæterås sende Florø-keeperen ut i full strekk med eit skot via ein forsvarar sju minutt før pause, men Hødd 2 fekk ikkje meir enn ein corner utav situasjonen, og den klarte ikkje heimelaget å utnytte.
Florø 2 fekk ein kjempesjanse fem minutt før pause, men sjølv om det kom to mørkeblå åleine med ein Hødd-forsvarar, så klarte dei ikkje å kome til avslutning, og Elias Flø kom seg tilbake for å rydde opp.
Det var tett på at heimelaget sikra eit tredje mål før laga gjekk til pause, men det ville seg ikkje framom mål, og dermed stod det 2-0 etter dei første 45.
Innbytarane ordnar mål
Hødd 2 starta den andre omgangen med ein stor sjanse, etter at Florø 2 ikkje klarte å klarere ballen. Isak Haanes vippa ballen inn til Sveinung Tilseth Sæterås, som fekk hovudet på den, men ikkje nok kraft i headinga til å overliste keeper frå vel åtte meter.
Det skulle uansett ikkje ta så langt tid før det vart 3-0. Johannes Sundgot slo eit langt innlegg, som passerte den første duellen i feltet og datt ned i beina på nyinnkomne Gustav Dimmen. Han gjorde ting enkelt, og plasserte ballen forbi keeper.
Florø 2 hadde sine forsøk, men sjølv om dei fleire gongar kom i farlege situasjonar så var det alltid eit Hødd-bein i vegen før det vart verkeleg farleg.
Like før 70 minutt var passert fekk Florø 2 endeleg til ei skikkeleg avslutning, etter at Hødd-forsvaret ikkje fekk fatt i ballen, men denne gongen var Sivert Pieroth på rett plass og redda til corner.
Håkon Botn Brautaset sette Florø-keeperen på prøve etter 77 minutt, då han vart spelt fram på venstresida og prøvde eit rapt skudd frå 16 meter. Der redda keeper, men han var ikkje i nærleiken minuttet seinare då Bastian Rasmussen presenterte seg for Høddvol-publikum med eit smell. Frå langt hald sende han ballen heilt opp i krysset til dagens klart flottaste scoring og 4-0.
Også mot slutten var det Hødd som hadde mest å gje, og laget burde nok ha sett endå ei scoring då både Brautaset, Flø og Haanes kombinerte seg inn i 16-meteren, men så gjekk det litt for sakte og bortelaget fekk rydda unna.
Gustav Dimmen sendte ballen i mål igjen då ein passerte 90 minutt på Høddvoll, men dommar annullerte for ein dytt i forkant og dermed enda det 4-0 på Høddvoll, og Hødd 2 enda dermed på ein 6.-plass i avdelinga.
