NRK sin friidrettsekspert og gullvinnar på 800 meter i Atlanta-OL i 1996 har fått med seg prestasjonane til den unge Dimna IL-utøvaren.

– No er han europeisk topp og han er heilt der oppe internasjonalt, seier Vebjørn Rodal til NRK.

Rodal fekk nok med seg løpet til Karsten på 200 meter og ikkje minst maktdemonstrasjonen på 400 meter, der han sprang i mål til ny innandørsrekord på 400 meter. På heimebane i Ulsteinvik sette han ny norsk rekord på tida 45,96. Årsbeste i Europa og nest best i verda i 2017.

– Eg blei overraska over at han sprang på 45-talet i første forsøk innandørs. Det er krevjande å springe innandørs, seier Rodal.

Kan ta medaljar i VM og OL

Etter eit skuffande OL i Rio de Janeiro sett med norske auge, trur Rodal Warholm kan segle opp som medaljekandidat både i VM til sommaren og OL i 2020.

– Utfordringa er å halde seg frisk og skadefri og få lov til å byggje kontinuitet og trene hardt over god tid. Dersom han klarer det er han i alle fall medaljekandidat på 400 meter hekk, og kanskje også på 400 meter utan hekk, seier han til NRK.