Det har blitt ein svært god vårsesong for Hareid IL sitt damelag i 4.-divisjon. Sju kampar er spelt og Hareid står no med seks sigrar og eitt tap. Tapet kom i lokaloppgjeret mot Hødd-rekruttane, som toppar tabellen etter vårsesongen.
Torsdag sikra Hareid seg ein ny siger, og det på overbevisande måte.
Til pause hadde Hareid allereie scora fire gongar. Victoria Røren, Hanna Holstad Grimstad, Matilde Hassel og Karina Gade teikna seg alle på scoringslista i den første omgangen.
Etter pausen sette Matilde Hassel inn sitt andre for kvelden, før Cecilie Skeide banka inn fire mål i løpet av om lag 20 minutt mot slutten av kampen. Hareid vann dermed med solide 9-0 heime på Hareidsmyrane.
Anita Waage sitt mannskap kan dermed ta ein velfortent ferie på andreplass, berre tre poeng bak Hødd, som også vann torsdag. Hareid har ei luke på åtte poeng ned til Bergsøy på tredjeplass, og det ser ut til at det er Hødd og Hareid som skal kjempe om topp-plasseringa i denne avdelinga utover hausten.
Neste kamp for Hareid blir først 24. august.