153 jenter og 68 gutar var samla i Holmen Tropp & Turn sin turnhall.

Edel Charlotte Eiken Fosse leverte årsbeste og utklassa konkurrentane sine i rekruttklasse 12 år. Ho enda på sterke 59,05 poeng etter 4 apparat og vann klassa si med med heile 3,5 poeng til nr. 2. Klassa hadde 45 deltakarar. Poengsummen hennar var så god at ho var best, uansett klasse.

Edel Charlotte turna til 15,5 i favorittøvinga  skranke. Det var karrierebeste. Ho hadde også høgaste D-karakter (vanskegrad) i si klasse. Også i bom turna ho til karrierebeste med 15,5 poeng. I hopp vann ho med eit meget godt utført kroppert thsukaharahopp med karakteren 13,0. I frittståande presterte ho også karrierebeste med karakteren 15,05.

Oppkøyringa til konkurransane i haust har vore svært god. Ho har fått med seg tre treningssamlingar med juniorlandslaget, og i sommar deltok ho også på ei internasjonal turnsamling i Italia med gymnastar frå heile Europa. Samlinga gav inspirasjon til vidare satsing og håp om å kunne kvalifisere seg til junior-EM i 2016.

Thale og Sofie

I tillegg til Edel Charlotte stilte Hødd med to jenter i klasse 1 (13-14 år):

Thale Veddegjerde viste til tider god turning og turna til karrierebeste og forbetra sluttpoengsummen sin med fleire poeng. Gode treningsøkter etter  sommarferien gir resultat. Ho turna ein solid konkurranse i hopp og frittståande, men var uheldig med eitt fall i bom-øvinga og eitt fall i skranke.

Sofie Fylsvik turnar i same klasse og gjorde det best i hopp. Ho var uheldig med fall i frittståande og fekk vel helst ein konkurranse litt under det ho faktisk er god for.

Midtnorsk-meisterskap og regionfinale på heimebane

Om vel to veker skal gymnastane frå Hødd vise seg fram på heimebane. Helga 8.-9. november skal IL Hødd Turn arrangere Midtnorsk meisterskap og regionfinale i turnhallen på Skeide. Om lag 150 gymnastar frå Nord- og Sør-Trøndelag og Møre og Romsdal er påmelde.

Til rekrutt-NM

Komande helg deltek Edel Charlotte Eiken Fosse i NM for rekruttar 11-12 år i Oslo, og helga etterpå turnar ho i den internasjonale Mälarcupen i Stockholm. Dette er første gongen ho konkurrerer utanlands.

Ref. IL Hødd Turn