Dimna-utøvaren Fride Møller Flatin var for første gong utteken på juniorlandslaget i friidrett til nordisk mesterskap i kappgang i Espoo i Finland, der det også blir arrangert nordisk juniorlandskamp denne helga. Møller Flatin er ein av to landslagsdebutantar under stemnet i Finland.
Fride har imponert tidlegare denne sesongen, med bronsemedalje både i senior-NM og junior-NM på 3000 meter kappgang.
I Finland konkurrerte Møller Flatin på 5000 meter, og som i dei to NM-konkurransene gjekk ho inn til ein tredjeplass med tida 28.14,19. Finske Taika Nummi var i leiinga frå start og vann til slutt suverent med tida 22.08,82. Finske Vera Rauhala tok andreplassen på tida 27.19,32.
- Det var kjekt å få prøve seg saman med juniorlandslaget, seier Møller Flatin på telefon frå Finland, før turen går heimover til Ulsteinvik.
Dette var første gongen ho prøvde seg på 5000 meter i konkurranse.
Korleis synest du at det gjekk?
- Eg veit ikkje heilt. Eg kjende på ei skade gjennom heile løpet, så det var litt irriterande.
Fride starta først med kappgang i år, og etter medaljer både i junior- og senior-NM fekk ho no prøve seg på juniorlandslaget.
Det har gått veldig fort?
- Ja, det har det absolutt. No har eg berre lyst å prøve meg meir fram. Prøve 5000 meter fleire gongar utan skade. Eg er veldig motivert til å halde fram. Eg merka at det var ein lengre distanse, men det gjekk greitt. Målet i dag var eigentleg berre å fullføre, seier Fride som godt kan tenke seg å vere med på Nordisk også neste år.
No er det UM som blir neste post på programmet for kappgjengaren. Det blir arrangert om to veker.
Også Karsten Warholm er i aksjon i Espoo denne helga. Han skal springe 400 meter hekk, 110 meter hekk og minst ein stafett, og opna laurdag med ein klar siger på langhekken.