Bortimot alle er kampklare

Torsdag skal Hødd møte Polonia Bytom. Dei spelar på nevst øvste nivå i Polen. Historikken deira er det ingenting i vegen med. Polonia Bytom vart seriemeistrar på øvste nivå både i 1962 og 1964. Fredag spelar Hødd nok ein kamp, då mot Oleksandria. Dei ligg i vinterpausen på 18.-plass i den ukrainske toppserien. I 2003 gjorde dei sin beste prestasjon nokon gong då dei enda på 13.-plass i same serie.

- Vi satsar på at alle skal få spele éin av desse to kampane. Nokon må kanskje delta i begge. Vi satsar i alle fall på at alle skadefrie spelarar får seg bra med speletid til saman, fortel Sindre Eid, Hødd sin hjelpetrenar.

Debut for Inyami

Hødd har med 22 utespelarar og tre keeperar til Tyrkia. Det inkluderer hospitantane Pål Skeide, Fredrik Aursnes, Robin Hjelmeseth, Henrik Hansen (keeper) og Havtor Skeide, i tillegg til prøvespelaren Christian Inyami.

- Vi er spente på å sjå Christian i kamp. Kanskje blir han å sjå i begge kampane. Vi vil gjerne sjå han i kamp før vi bestemmer oss for om vi skal gå for han, seier Sindre Eid.

Skadesituasjon i betring

Namnebror Christian Mork er ein av fleire Hødd-spelarar på veg tilbake frå skade. Også Erik Sandal, Ruben-Kenneth Brandal og Fredrik Klock er truleg kampklare. Den einaste som ser ut til å vere uaktuell for å spele kampar i Tyrkia er Eirik Heltne, som framleis er i opptrening.

- Skadesituasjonen ser veldig bra ut. Fleire spelarar er tilbake etter å ha slite med ulike skadar i vinter. Men vi ser an treninga vi skal ha torsdag morgon før vi bestemmer oss endeleg for kven som spelar mot Polonia Bytom, forklarer Sindre Eid.

Ettermiddagskampar

Begge kampane startar klokka 15.30 – tyrkisk tid. Det vil seie klokka 14.30 norsk tid. Du kan følgje kampane live på vikebladet.no.

Les også meir om Hødd sitt Tyrkia-opphald i torsdagens papirutgåve av Vikebladet Vestposten.