Mange nytta høvet til å gå i det kombinerte barne- og borgartoget på Hareid i det nydelege vårvêret. Etter kransinga av minnesteinane ved kyrkja og festgudsteneste, samla folket seg ved barneskulen for å ta del i toget.

Tradisjonen tilseier at toget gjer ein stogg ved sjukeheimen. Dette vart også gjort i år. Her vart nasjonalsongen framført og det vart også overrekt blomar. Deretter gjekk toget ned til sentrum, over Lòket og vidare inn Kjøpmannsgata. Siste stykket, over Pålhaugen, gjekk vegen over ei eng full av vårblomar.

Vel framme ved Hareid stadion venta leikar, konkurransar og anna moro. Under familiefesten i Hareidhallen var det ulike kulturinnslag og nasjonaldagen vart avslutta med festsamling på Hadartun.