- Eg er utruleg takknemleg for å få lov til å jobbe med så dyktige musikarar. For meg er dette ein draum som går i oppfylling, seier Fredrik i følgje den utsende pressemeldinga, der han ramsar opp namn som Jens Fossum, Even Kruse Skatrud, Anders Farstad og Børre Dalhaug, for å nemne nokon. Sistnemnde er ålesundar og fast trommis i The Real Thing, i tillegg til at han har sitt eige storband. Trompetisten Anders Farstad kjem frå Volda og er ein av veteranane i The Goodfellas. Anders studerer for tida klassisk musikk i Århus, og har utmerka seg som eit svært stort talent i utallige samanhengar. Turnéen begynner 2. mars på det nye Ingebrigt Davik-huset i Brattvåg, og vert avslutta i Oslo og Drøbak i slutten av månaden. Både Herøy, Ålesund og Geiranger står på speleplanen, men løypa går ikkje innom Ulsteinvik denne gongen. - Det hadde sjølvsagt vore kjekt å spele på det nye kulturhuset, men denne turnéen har vore på teikneblokka i snart eit år no, og då klaffa det ikkje med heimbygda, seier Fredrik. Men han legg til at det ikkje er umogleg at dei kan kome tilbake når Sjøborg står ferdig ut på våren. Moromann Fredrik Steen er til dagleg mest kjend som allsidig humorist, men no altså – solist for eit heilt storband. - Korleis heng dette i hop, då, Fredrik? - For nokre år sidan oppdaga eg at eg trivdes mykje betre med å synge enn eg var klar over. Eg har teke fleire og fleire songoppdrag, samt at eg likar å snike inn ein song her og der i showa mine, seier Fredrik. Det er mange som etterkvart har fått høyre songaren Fredrik Steen i aksjon, enten på intimkonsertar med ein trio, eller i større samanhengar slik som i fjor, då Fredrik var solist på festkonserten til NM i Brass, og song for ein fullsett Grieghall i Bergen: - Ja, det var ei stor oppleving. Dette var tredje gongen eg jobba saman med Eikanger Bjørsvik, og vi syslar med tankane om å finne på enda meir gøy saman. Jazzar opp Aasen Bandsjefen og trombonisten i The Goodfellas, Erling Digernes, oppdaga songaren Fredrik i Stavanger Konserthus for tre år sidan, og tenkte at dette måtte vere noko for The Goodfellas. Dei sjølve hadde alt rykte på seg for å vere ein skikkeleg friskusgjeng på scena: - Kombinasjonen musikk og humor er ein uslåeleg kombinasjon, og Fredrik imponerer stort på begge frontar. Vi tok kontakt, og ifjor sommar gjorde vi ein miniturné på Nordvestlandet, med svært gode kritikkar og tilbakemeldingar, seier Digernes. Dei sette umiddelbart i gong med å planlegge ein meir omfattande turné no i mars, med meir eller mindre kjende og swingande jazzlåtar på repertoiret. I tillegg har dei jazza opp arrangert nokre kjende, nynorske songar, som dei gler seg stort til å framføre. - Ja, vi kan jo røpe at vi mellom anna skal jazze opp Ivar Aasen, men det er ikkje ”Mellom bakkar og berg”, seier Erling Digernes. Meir vil han ikkje seie om den saka. Og sjølv om Fredrik til dagleg er mest kjend som moromann, skal ingen vere i tvil om at dette er ein jazzkonsert, melder Digernes: - Det er i aller høgste grad ein konsert, ja, og eg garanterer at det kjem til å skrelle i veggane på denne turnéen. Men kjenner eg Fredrik rett, klarer han neppe å halde kjeft mellom låtane, gliser bandsjefen i The Goodfellas.

Gode gutar: Storbandet The Goodfellas Band har fått med seg komikaren Fredrik Steen på laget. Konsertturnéen ?For swingende? startar på Ingebrigt Davik-huset fredag 2. mars. Dei av dei av tolv musikarane som hadde tid til å stille opp på bildet, er frå venstre: Jens Fossum (bass), Fredrik Steen (song) Børre Dalhaug (trommer), Håvard Graff (piano) Bendik Giske (altsax) og Erling Digernes (trombone) Foto: FOTO: Peder Songedal