«Rockeulven» rocka Sjøborg

Både store og små hadde tatt turen til Sjøborg kulturhus, til den fullsette gratisframsyninga til Sunnmøre Folkehøgskule tidleg laurdag ettermiddag.

Skal sette opp "Rockeulven": – Vi er veldig spente, men trur det blir veldig gøy

Dei om lag 120 folkehøgskuleelevane har saman med tilsette ved skulen jobba i vekevis med framsyninga – og resultatet stod verkeleg til 20 i stil.

Dei hadde så langt hatt fire skuleframsyningar av musikalen – og skulle vise den éin gong til seinare på dag, laurdag.

«Rockeulven» er opphavleg basert på «Ma-ma», ein rumensk-russisk-fransk musikalfilm frå 1976. Det eksisterer mange ulike sceneversjonar av musikalen – men den versjonen Sunnmøre Folkehøgskule kunne vise fram var både engasjerande og stemningsfull. Folkehøgskulen har også sett opp «Rockeulven» tidlegare – men det er fleire år sidan sist.

Der fekk vi møte ei geitemamma som tok morsrolla si verkeleg på alvor – og som pliktoppfyllande tok vare på geitekillingane sine. Ho lærte geitekillingane sine ein heilt spesiell song ho skulle synge når ho kom heim frå marknaden – som berre ho kunne. Men den slu ulven høyrde sjølvsagt på det som blei sagt – og prøvde å lure killingane med å etterlikne mora. Det lukkast han ikkje med første gongen – men han måtte naturlegvis prøve igjen.

Resten av historia inneheldt ei kidnapping, ein heil skog som på grunn av det stod saman mot ulven og kompanjongane hans – og ein lukkeleg slutt.

Folkehøgskuleelevane fekk også publikum opp frå seta sine i løpet av musikalen – då dei inviterte til å danse BlimE-dansen frå i fjor. Artig!

Du kan sjå fleire bilde frå musikalen under: