Den årlege, landsomfattande miljøaksjonen Strandryddedagen blir i år halden laurdag 9. mai. Denne dagen ryddar vi strendene våre for plast og søppel. Aksjonen vart starta i 2011 – og har vakse i omfang kvart år.
I fjor vart ei samla kystlinje på 320.000 meter rydda. 14.000 søppelsekkar vart fylte og det vart lagt ned meir enn 20.000 frivillige arbeidstimar.
Alle fylke i landet deltek.
SSR inviterer kommunane Hareid, Ulstein, Sande og Herøy til å slutte opp om aksjonen også i år. Selskapet stiller med sekkar og tek imot avfallet vederlagsfritt frå dei som har fylt ut eit registreringsskjema for aksjonen.
Både privatpersonar, lag og organisasjonar, barnehagar og skular blir oppmoda om å delta i aksjonen, som vil pågå i både veke 19 og 20.
Både SSR og servicekontora i dei ulike kommunane deler ut sekkar.
Dei lokale miljøstasjonane i Saunesmarka, Larsnes og Eggesbønes tek i mot sekkane i opningstida.