Endeleg, etter to avlysningar pga pandemien, er no supergruppa Koinonia eller All Star Band som dei kallar seg no, klar for konsert på Flø søndag 14. august.

– Dette har vi jobba lenge for, seier konsertarrangørane i Sponders. Konserten er ein del av SommarFLØrt som går av stabelen på garden til Oddbjørg Vartdal og Lasse Holstad på Flø 12 – 14. august.

– Dette blir ein fantastisk mimrekonsert, seier frontfigur Bill Maxwell, der vi vil spele mange av dei kjende melodiane i frå Koinonia, samt songar av Per Erik Hallin, Chicago og Andrae Chrouch. Dokke vil få høyre: More than a feeling, Frontline, Cuando, Grace, Gospeltrain og Crouch sin fantastiske Livin this kind of life og mange, mange fleire. – Vi gler oss stort, held Bill Maxwell fram og ut frå bilda eg har sett av Flø så ser det ut som «the most wonderful place on earth».

Koinonia var store på Sunnmøre på 80-talet og heldt heile fire konsertar i distriktet. No er dei tilbake og gler seg meir enn nokon gong til å få møte publikum og sjå ein av favorittstadane sine: Sunnmøre. Konserten vert halden på Andreasgarden på Flø. Der er det godt med parkering, gode sanitærforhald. Med den maleriske konsertramme som Flø gir er det duka for ei storhending. Billettsalet har gått over all forventning og ein kan vente eit storinnrykk på Flø. Meir info finn du på heimesidene til SommarFLØrt.

I tillegg til topp musikarar som Bill Maxwell og Hadley Hockensmith frå Koinonia kjem også vokalisten i Chicago Lou Pardini. Det vert også nokre songar frå katalogen til det verdskjende bandet Chicago

Det er musikarar i verdsklasse som kjem til Flø. Oppe til venstre: Lou Pardini (vokalist i Chicgao), Hadley Hockensmith (gitarist for Neal Diamond og Koinonia), Bill Maxwell (trommerslagar for Koinonia, Andrae Chrouch m fl.) og pianovirtousen Per Erik Hallin. Framme frå venstre Trond Helgerud (keyboard), Sven Fridolfsen (blås for Himlaväsen), Lars Danielson (bassist for bl.a. Michael Ruff og Lisa Nilson) og pianist Arvid Pettersen (eigen plateproduksjon). Foto: pressefoto

Bandet består av:

Bill Maxwell (trommer) Koinonia, Andrea Crouch, Keith Green, Winans

Hadley Hockensmith (gitar) Koinonia, Neal Diamond, Andrea Crouch

Lou Pardini (vokal, keyboard) Koinonia, Chicago, Andrea Crouch

Lars Larry Danielsson (bass) Michael Ruff, Lisa Nilsson

Sven Fridolfsson (sax) Himlaväsen

Trond Helgerud (Fender Rhodes) Kapellmester, Sgsang husband

Arvid Pettersen (piano,vocal) 10 innspillinger og 2500 konserter

Per Erik Hallin (vocal) Artist, låtskriver, pianist for Carola.

I tillegg til vakre Flø legg dei turen til Oslo, Langesund, Bergen, Halmstad og Jönköping. Det er ikkje første gongen Flø får verdskjende artistar – men so mange verdskjende musikarar samla på ein gong er sjeldant og noko vi gler oss stort til.

Vermeldingane til helga ser veldig bra ut, så dette vil bli ein konsert for minneboka med vakre Flø.

Søndag 14. august vert det konsert med verdsstjernene frå Koinonia. Dagane før vert den fylt med over femti marknadsboder og konsertar på kveldstid. Foto: Magne Grimstad jr.